Ameyórase l'accesu a cuatro espacios costeros con proteición

Les actuaciones busquen minimizar les posibles afeiciones al ecosistema dunar. Éstes son les sableres de la rede RENA sobre les que s'actuó.

La Conseyería de Fomentu, Cooperación Llocal y Prevención de Quemes fixo actuaciones nes sableres de Penarronda, Barayu, Xagón y Vega, espacios costeros protexíos que formen parte de la Rede Natural d'Asturies (RENA). Los trabayos, que supunxeron una inversión de 25.000 euros, centráronse na llimpieza y ameyoramientu de l'accesibilidá a estes zonas d'altu valir natural.

Nesi sen habilitáronse siendes y pasareles que permiten canalizar el fluxu de visites, al tiempu que minimicen les posibles afeiciones al ecosistema dunar. Les actuaciones enmárquense nel programa añal de conservación de les infraestructures d'usu públicu en RENA.

Les playes

La sablera de Penarronda, asitiada ente los conceyos de Castropol y Tapia, y la de Vega, en Ribaseya, declaráronse monumentos naturales pola singularidá de los sos conxuntos dunares y la confluencia de pequeñes chaques temporales onde habiten multitú d'anfibios. Pela so parte, la playa de Xagón, en Gozón, forma parte del paisaxe protexíu del Cabu Peñes polos sos valiosos sistemes dunares, ún de los más amplios del país.

Barayu, mentes, ye una reserva natural parcial allugáu ente Valdés y Navia, xusto na desembocadura d'El Ríu Barayu, que forma un estuariu d'altu valir natural y gran calidá paisaxística. Ye un entornu privilexáu onde crecen especies de flora de gran interés botánicu.