Ambás presenta en conciertu la música tradicional de L.lena

El músicu y investigador etnográficu Xosé Antón Fernández "Ambás" presenta esti xueves 19 nel Teatru Vital Aza de La Pola (conceyu de L.lena) el so últimu discu - trabayu d'investigación "Música tradicional en conceyu L.lena" una obra que recueye nun un doble CD más de 40 temes tradicionales l.lenizos nos que se representen tolos xéneros musicales populares que se dan nesti conceyu del sur del país recoyíos pol mesmu Ambás.

El Conceyu de L.lena, al traviés del Serviciu de Normalización Llingüística, corrió a cargu de la edición d'esti perimportante trabayu que supón una continuidá col yá conocíu "Música tradicional d'Ayande" nel qu'Ambás y otros músicos recuperaben les tradiciones musicales del conceyu. La tirada ye de 1.000 exemplares.

Xosé Antón Fernández "Ambás" anduvo peles parroquies de Chanos, Payares, Piñera, Parana, Carabanzo, Teyeo, La Romía, Congostinas, El Quempu, Carraluz, Palacio y La Cruz tres de los sones más característicos de L.lena, saliendo del so llabor un discu que ye "un trabayu básicu y necesariu pa conocer la realidá cultural del conceyu, non solo pa la xente de fuera, sinón tamién pa los mesmos vecinos" como s'afirma na nota de presentación.

L'Alcalde de L.lena, Hugo Morán, la conceyala de Cultura, Paz García van asistir a la presentación del discu, na que l'autor del trabayu, Xosé Antón Fernández "Ambás" va contar cola collaboración d'un grupu de vecines y vecinos de los pueblos qu'apaecen nel discu, y quevan interpretar en directo dellos de los temes del doble CD.