AMA estrena n'Uviéu'l formatu d'alderique feminista l'AMAgüeta

Tresllada la iniciativa La Fañagüeta de Les Rudes d'Avilés pa falar de temes políticos.

"L'AMAgüeta naz de La Fañagüeta, espaciu d'alderique feminista del coleutivu Les Rudes d’Avilés, como forma de plantegar cualquier tema d'interés y actualidá dende l'humor, la cercanía, la chancia y el feminismu", espliquen dende l'Asamblea Moza d'Asturies (AMA). La primer esperiencia con esti formatu va tener llugar mañana, a les 20.30 hores, en La Piel del Tripulante (San Xosé 2, Uviéu) y lleva'l nome de 'De perroflautes a feminazis; del 15M al 8M'.

Na mesma va facese "un percorríu al traviés del “filo de la historia', el que xune'l 15 de mayu del 2011 y el 8 de marzu del 2018". Va falase de los nomaos perroflautes "qu'ocuparon les places y camudaron pa siempre les formes de ver y facer la política", y de les "feminazis qu'entamaron una fuelga xeneral masiva y impautante pal mundu enteru", asina como de "les conexones ente dambes feches".

Muyeres de coleutivos que participaron de manera direuta o indereuta nestos eventos nel país, como les Asamblees d'Estudiantes de la Universidá d'Uviéu y el Frente Feminista de la Universidá, les Marches de la Dignidá, la Plataforma de Afectados por la Hipoteca y Desahucios de Asturias, les acampaes del 15M y la coordinadora asturiana del 8M, van ser les ponentes d'esta primer actividá de l'AMAgüeta. El formatu va contar con performances humorístiques, alderique abiertu colos presentes, rifes, sorpreses y música col grupu Filanda y con DJ Llorarbailando.