Álvarez pide flexibilidá pa los ganaderos en casu de que la seca s'agrave

|

La conseyera demanda a la ministra Isabel García Tejerina que puedan cobrar les ayudes agroambientales si se da la situación de vese obligaos a retirar les reses de pastos d'altor.

Nuna xunta en Madrid del Conseyu Consultivu de Política Agrícola p'Asuntos Comunitarios, María Jesús Álvarez González pidió a la ministra que l'adelantu de la recoyida de les reses por falta de camperes nun se considere un incumplimientu de les midíes agroambientales, de tala forma que los ganaderos “puedan cobrar estes subvenciones si se ven obligaos a adelantrar la retirada de los animales”, señaló la conseyera de Desarrollu Rural y Recursos Naturales. Amás, na conferencia alcordóse tresferir a Asturies un total de 4,9 millones de fondos del Ministeriu d'Agricultura, de los que casi 700.000 euros son pa distintos programes como los de races autóctones, control llecheru, fomentu de l'apicultura, campaña de saneamientu ganaderu, prevención y llucha contra plagues o la promoción de la fruta y la lleche nes escueles.

El restu, 4,2 millones, correspuende a la asignación al Programa de Desarrollu Rural (PDR) del Gobiernu d'Asturies pal presente exerciciu económicu. Nel PDR intégrense toles llinies d'actuación de la conseyería pal sector primariu, que van dende la modernización d'esplotaciones y incorporación de mocedá, hasta la diversificación económica del mediu rural, que se xestionen al traviés del programa Leader, pasando pol desenvolvimientu de midíes forestales y la preservación de los recursos naturales.

Álvarez tamién repitió les esixencies d'Asturies na negociación de la próxima Política Agrícola Común (PAC). Nesti sen, manifestó que'l país nun pue ver amenorgaos los sos fondos depués de 2020: “Nin un euru menos p'Asturies”, esixó.

Contador Estadistiques