Álvarez Areces anuncia aiciones llegales contra Podemos por un panfletu

L'ex presidente y candidatu del PSOE al Senáu defende la xestión del so Gobiernu contra la corrupción y recuerda que nun foi imputáu.

Nun alderique anueche en Canal 10 ente candidatos al Senáu de PP-Foro –representada pola forista Rosa María Domínguez de Posada, númberu 3–, PSOE y Xuníos Podemos, el socialista Vicente Álvarez Areces y el númberu 2 de la coalición d'izquierda Lluismi Orviz, protagonizaron un tensu enfrentamientu. A lo llargo del mesmu tocáronse dellos temes, pero'l que más caleció l'ambiente foi'l de la corrupción.

Orviz acusó a Álvarez Areces de tener responsabilidá nel 'Casu Marea' y n'otres "irregularidaes" del so Gobiernu, lo qu'indignó enforma al hasta agora senador. "Esti Gobienu que yo presido foi'l que denunció énte la Fiscalía nel momentu que conocimos esos fechos y los tribunales decidirán les responsabilidaes de cada cuál", afirmó, pa depués advertir al otru candidatu que "nun mienta". D'igual forma anunció midíes llegales contra Podemos "por un panfletu n'Uviéu que pon 'todos contra la corrupcion' cola mio semeya y una cifra al mio llau, que yá tomaré midíes llegales porque son inxuries".