Alumnos del CAI de Meres creen un cómic n’asturianu

‘Castrones a la carrera!!’ ye’l nome del cómic en llingua asturiana fechu polos alumnos y alumnes del Centru d’Apoyu a la Integración La Arboleya, asitiáu en Meres. El proyeutu, nel que participaron 17 persones, tuvo un llargor de 20 meses y podría completase nel 2017 con un curtiumetraxe sobre esti "culebrón asturianu".

Cola intención d’aproximar al llinguaxe audiovisual pa persones con discapacidá, los responsables del CAI La Arboleya punxeron en marcha esta iniciativa que recueye cinco histories rodaes en dellos llugares de la xeografía del país con teléfonos móviles y cámares doméstiques. Éstes foron editaes darréu seleicionando los meyores fotogrames y convirtiéndolos en viñetes de cómic, tres el correspondiente tratamientu de la imaxe.

Asina, Alejandra Noriega, Daniel Baniela, Piluca Sixto, Emilia Campa, Elena González Junco, María José Gómez Oliveros, Daniel García Barril, Herminia Martínez Vega, Paloma Díaz Vázquez, Javier Fernández Rodríguez, Jairo Prieto, Ana María Pérez Cotarelo, Raquel Fernández Prado, Manuel Ángel García García y María Jesús Martín González, col sofitu de los profesionales del CAI La Arboleya Santiago Martínez Andrade y Armando del Campo, protagonizaron les distintes fases de producción de la historia: dieron nome a la productora, la Meres Big Band; escribieron el guion y los diálogos; fabricaron l’atrezzo; y encargáronse de la iluminación, la realización y la interpretación. El resultáu ye ‘Castrones a la carrera!!’, cómic n’asturianu con una tirada de 1.000 exemplares que se va repartir ente usuarios y familiares de los distintos centros d’apoyu a la integración del país y que se va presentar el vienres na instalación sierense a les 11.30 hores.

La Fundación Asturiana d’Atención y Proteición a Persones con Discapacidaes y/o dependencies (Fasad), dependiente de la Conseyería de Servicios y Derechos Sociales, edita esti trabayu, que permitió a los alumnos y alumnes del CAI La Arboyela “la oportunidá de rellacionase nos sos viaxes a los rodaxes, conocer espacios nuevos y facese presentes en sociedá”, esplica Martínez Andrade. Fasad xestiona cinco centros d’apoyu a la integración, asitiaos en Meres, Villalegre, Les Arriondes, Candás y Navia, nos que presta atención a más de 200 persones adultes con discapacidá.