"Altor de mires y un bon xacíu", pidimientu de la XDLA a los diputaos

|
Carlos Pulgar XDLA votación procesu reforma Estatutu

El vienres vótase na Xunta Xeneral l'apertura del procesu de reforma del Estatutu d'Autonomía pa incorporar la oficialidá.

"Llamamos a toles diputaes y diputaos pa que sigan alantre col procesu", demanda Carlos Pulgar, voceru nacional de la Xunta pola Defensa de la Llingua Asturiana (XDLA), que recuerda que mañana nun se vota la oficialidá, sinón abrir un alderique col entamu d'una comisión na que tolos partíos pueden presentar les sos propuestes pa la redaición del artículu 4 del Estatutu. "Pidímos-yos altor de mires y bon xacíu", añade.

Que la propuesta presentada por Podemos y Izquierda Xunida (IX) nun algame la mayoría absoluta de la Cámara, esto ye, 23 diputaos, nun ye pa Pulgar un fracasu, sinón tolo contrario al entender que se trata de "un fechu históricu". "Dende'l minutu 1 vamos siguir coles reivindicaciones adaptándoles a les circunstancies de cada momentu: el debate presupuestariu, la ellaboración de programes pa les eleiciones... Nun cambia nada", esplica Pulgar, que llamenta "la interpretación restrictiva del reglamentu de la Cámara" qu'impide l'alderique ampliu sobre la reforma del Estatutu.

La XDLA va tar presente mañana na Cámara xunto con representantes d'organizaciones y sindicatos que sofitaron la iniciativa 'Proyectu 2018 pola Oficialidá’ pa siguir el Plenu en direuto.

 

Contador Estadistiques