Alonso pudo ganar en Suzuka

Fernando Alonso nun pudo acabar la temporada como elli quixere, pero'l carbayón demostró na carrera del Xapón que pue ser un aspirante seriu al títulu pal añu qu'entra. Alonso, que salía na quinta plaza de la parrilla, foi de menos a más y acertó con unaestratexa de facer menos paraes en boxes que los sos competidores, esguilando hasta la segunda posición. Cuando'l Renault del asturianu taba enseñándo-y el focicu al lider, el Ferrari de Barrichello, el coche francés arreventó dexando a Alonso ensin los caberos puntos de la temporada.

Sicasí, la emoción taba n'otra parte. La miga de la carrera taba en ver si Michael Schumacher yera quien a ganar el sestu títulu mundial, baltiando'l record de Fangio, empatáu col alemán a cinco campeonatos. El de Ferrari precisaba de marcar namás un puntu y que'l Finlandés de McLaren Mercedes Kimi Raikkonen nun ganare la carrera. barrichello, compañeru de Schumacher, encargose de torgar lo primero pasando elli en primer posición la bandera de cuadros, mientres que l'alemán, depués de dellos toques con otros coches, foi quien a entrar 8º, colo que sumaba'l puntu de marres. L'añu qu'entra será otru cantar.