Alonso falló nel Canadá

Fernando Alonso foi noticia ayeri por cometer el primer fallu de tola temporada. Ello foi nel Gran Premiu del Canadá, octava carrera del Mundial de Fórmula 1 na que l'asturianu marchaba encarriláu hacia otru trunfu cuando na vuelta 38 el Renault esnidió lo xusto pa tocar cola rueda d'atrás una muria de protección del circuitu. El coche siguió en pista, pero la suspensión d'atrás taba descompensada y Alonso tuvo d'abandonar una carrera qu'a la fin ganó'l so mayor enemigu na llucha pol títulu mundial, el Finlandés Kimi Raikkonen, que tuvo acompañáu nel caxón polos pilotos de Ferrari, Schumacher y Barrichello, que demostraron la recuperación de los coches encarnaos, con méritu especial pal brasileñu, que remontó dende l'últimu puestu na clasificación.

Sicasí, la semeya del podium final nun espeya tolo que pasó na carrera, que de mano pintaba mui bien pa los coches azules de Renault. Fisichella y Alonso pasaron namás prendese'l semáforu verde a Schumacher y al "poleman" Jenson Button. Fisichella, que se punxo primeru, fizó-y tapón a Alonso que pidió permisu pa pasalu, per l'asturianu tuvo d'esperar a dempués de la primer parada en boxes, cuando l'italianu s'alcontró con problemes mecánicos que lu llevaron dempués al abandonu. Alonso garró un lideratu que diba durá-y poco porque entós llegó la yá mencionada muria de les llamentaciones, la mesma en que quedó'l Bar-Honda de Jenson Button poques vueltes dempués. Montoya, col segundu Mclaren, quedó de lider tres de l'abandonu d'Alonso hasta que na segunda parada en box salió tres de Raikkonen, eliminándolu amás poco dempués los comisarios por maniobra illegal. El finlandés, viéndose yá ganador, dedicóse nes últimes vueltes a cortar pela freba l'atque de Michael Schumacher, que nun pudo pasar la flecha gris anque llegó a ponese a mui poca distancia d'ella, aporfiando nuna lluvia que nun llegó pa pasar al McLaren Mercedes. Alonso sigue líder del mundial con 22 puntos sobre Raikkonen.