Alonso, col mundial en bolsu

Fernando Alonso volvió a xugar la baza del mayor aguante del so Renault pa imponese nel Gran Premiu d'Alemaña, que se disputó ayeri en circuitu de Hockenheim. El sestu trunfu nel mundial 2005 déxa-y el títulu al asturianu a tiru de 35 puntos cuando éntovía queden per delantre nel calendariu circuitos onde Alonso s'afaya mui a gustu, casu del d'Hungría o'l de Bélxica.

Dende que se prendió'l semáforu verde, l'asturianu y el Finlandés demostraron que tan un escalón penriba de los demás, escapándose del restu de los coches col McLaren abriendo pista. Fernando perdía contactu a cada vuelta col coche del Finlandés, pero ente ellos y el terceru, Michael Schumacher, la diferencia yera d'escándalu.

Alonso y Raikkonen protagonizaben un duelu con ventaya pal nórdicu hasta qu'entraron a cargar gasolina na vuelta 22 y la 24 respectivamente. L'asturianu, en viendo que'l McLaren yera más rápidu que'l Renault, fizo un apueste arriesgáu cargando menos gasolina pa dir más sueltu y poder amenazar al líder. Fuere pol apertón d'Alonso o por culpa del calor, el motor Mercedes del coche del finlandés arreventó diez vueltes dempués, dexando'l mandu de la carrera en manes del coche azul, que nun tuvo más qu'aselar les revoluciones del motor y dexase llevar hasta la bandera a cuadros. Per detrás d'elli, Fisichella, col segundu Renault, superaba tolos problemes del entamu de la carrera, adelantando al mesmu Michael Schumacher, que perdía con n Ferrari desconocíu incluso la tercer plaza a manes de Jenson Button, que xubió al caxón con un BAR-Honda mui recuperáu.