Alonso aconceyó en Madrid cola ministra Celaá

Genaro Alonso desplazóse a Madrid p’aconceyar cola ministra d’Educación y Formación Profesional, Isabel Celaá. Nel alcuentru d’esti miércoles tratáronse dellos asuntos, ente ellos la creación de la especialidá docente, pero la información tresmitida pola conseyería nun fai referencia a esta cuestión.

Nuna nota de prensa destaca que’l responsable d’Educación y Cultura “solicitó güei al Gobiernu central mayor sofitu pa la escuela rural y pa la estensión del primer ciclu d'Infantil, amás de la puesta en marcha de midíes que favorezan la gratuidá de los llibros de testu”. Les dos primeres cuestiones yeren les prioridaes destacaes por Alonso en setiembre na Xunta Xeneral cuando anunció la so intención d’entrevistase cola ministra, a lo que sumó la creación de la especialidá docente de Llingua Asturiana y Gallego-asturiano, de la que nun s’informa nel comunicáu.

Según confirmó’l gabinete del conseyeru a Asturies.com, la especialidá sí formaba parte del orde del día, polo que llama l’atención l’ausencia d’información al respeuto. Esta demanda ye un compromisu del Gobiernu pa esta llexislatura –a la que-y queden cinco meses raspiaos– y tuvo bloquiada en Madrid pol PP, dalgo que s’esperaba que camudara col cambiu nel Executivu central y la presencia de Celaá al frente del ministeriu.

Anteproyeutu de llei de modificación de la LOE

La reunión d’esta mañana vieno tres un pidimientu nuevu d’Alonso pa entrevistase con Celaá coinciendo cola Conferencia d’Educación del miércoles pasáu onde se trató’l  l’anteproyeutu de llei de modificación de la Llei Orgánica d’Educación (LOE) pa la derogación de la LOMCE. La so intención yera treslladar a la ministra les demandes asturianes al respeuto: una atención especial al problema de la despoblación y la dispersión xeográfica, con llinies específiques pa la sostenibilidá y consolidación de la escuela rural y prioridá nos presupuestos a esti tipu de centros pa garantizar la so viabilidá; y la dotación de fondos de cooperación específicos que permitan financiar la estensión de la rede de 0 a 3 años, sobre manera na etapa de los 2 años.

La conseyería tamién informa qu’Alonso defendió énte la ministra que les empreses y entidaes nun tengan que cotizar polos estudiantes que participen n'estancies formatives curriculares, unos 4.900 por cursu n'Asturies, una midida que ta recoyida nel Real Decreto-Llei 29/2018, de 28 d'avientu, pa la revalorización de les pensiones públiques y otres midíes urxentes en materia social, llaboral y d'empléu. Por último, indica que suxurió que los Institutos d'Educación Secundaria (IES) qu'impartan ciclos formativos queden homologaos automáticamente pa espedir certificaos de profesionalidá y dispongan d'una llinia de financiación específica.

Na semeya, el secretariu d'Estáu d'Educación Alejandro Tiana, Alonso y Celaá.