Allende participa nel taller de llectura n'asturianu de Corvera

L'escritor llavianés va aldericar en Les Vegues sobre la so obra 'Cuadernu de rayes'.

El taller de llectura n'asturianu qu'entama la Casa de la Llingua de Corvera ye una actividá d’animación a la llectura p’adultos de calter gratuitu, consistente na llectura de llibros y alcuentros colos autores de los mesmos, y que busca ufrir la pluralidá y diversidá de voces y temátiques de la lliteratura asturiana d’anguaño. Nesta ocasión la obra escoyida ye 'Cuaderno de rayes', una compilación de rellatos de Miguel Allende que primero publicara nel blogue homónimu.

Allende ye profesor del Orfanatu Mineru y poeta que ganó los premios más prestixaos de la lliteratura asturiana coles obres 'Güelgues de gallón' y 'Pastoral en Sol mayor', amás d'espublizar otros llibros destacaos, casu del poemariu 'Pallabres de payaso' o de la traducción de 'El médicu a palos' de Moliére. Tamién lleva’l blogue Cuadernu de rayes, del que salieron les histories que nel 2013 se publicaron en llibru col mesmu nome y col sellu d’Ediciones Trabe.

Nél los llectores atopen histories de ficción, narraciones enllenes de compromisu social, anéudotes qu’entemecen lo real colo fantástico y asocedíos que lleven de l’Asturies campesina al París más lliterariu. Güei Allende va protagonizar la sesión del taller de llectura, impartíu pol responsable del serviciu de normalización llingüística corveranu, Rafael Rodríguez Valdés, nun actu que va desendolcase a les 18 hores nel Centru Sociocultural de Les Vegues.