Allancada definitivamente la negociación pa los presupuestos ente socialistes y IX-BA-LV

Nun hai tratu ente les dos formaciones d'izquierdes de la Xunta Xeneral pa les cuentes asturianes del 2008. Dempués de más d'una selmana de cruce de comunicaos y declaraciones, les dos partes dieron por imposible llegar a un alcuerdu ente nueves acusaciones de falta de seriedá y de querer facese de menos la una a la otra.

Asina, el coordinador d'IX, Jesús Iglesias responsabilizó a la Federación Socialista Asturiana (FSA), y al so secretariu d'organización, Jesús Gutiérrez, de dar por pesllada cualquier posibilidá de diálogu sobre'l proyectu de presupuestos. El coordinador d'IX aseguró que la coalición "demostró una paciencia infinita" porque lleven nueve díes naguando por un borrador de presupuestos que permitiera entamar la negociación que pidía'l Gobiernu.

Nuna rueda de prensa xunto a los máximos responsables de BA, Rafael Palacios y LV, Nacho González, destacó que les declaraciones feches ayeri por Jesús Gutiérrez "frustaron cualquier posibilidá de diálogu, como se frustró y colos mesmos protagonistes" hai unos meses l'alcuerdu de Gobiernu. "Ayeri la FSA salió n'apoyu del presidente del Principáu y esti una vez más va tener que decir 'cuerpu a tierra' que vienen los míos", dixo Iglesias, qu'añadió que'l zarru a la posibilidá d'aprobar los presupuestos acredita una vez más la "debilidá del Gobiernu".

La coalición insistió en que la responsabilidá esclusiva de que nun fuera posible l'alcuerdu ta na FSA, que dio por pesllada cualquier posibilidá poniendo al gobiernu escontra la parede. Iglesias entrugóse amás por qué nun s'entregó'l borrador de presupuestos si de verdá los socialistes teníen intención de negociar.
Izquierda Xunida-Bloque por Asturies-Los Verdes afirmó qu'agora falta ver cómo se posiciona cada grupu parlamentariu na Xunta Xeneral del Principáu y evitó adelantar la so posición hasta non conocer el proyectu presupuestariu nel Parlamentu.


Pela so parte, la conseyera d'Alministraciones Públiques y Vocera del Gobiernu, Ana Rosa Migoya, dixo güei qu'IX-BA-LV ya tenía tomada en xunu la decisión de non llegar a nengún alcuerdu en materia de los presupuestos del 2008. Asina, acusó a la coalición de buscar agora toa clase de "escuses y prestestos" pa tentar de tomar una decisión que ya tomaren nel mes de xunu, cuando les negociaciones ente FSA-PSOE y IX-BA-LV pa formar Gobiernu nun salieron alantre.
D'esta manera, na rueda prensa posterior al Conseyu de Gobiernu y a entrugues de los periodistes, Migoya salía al pasu de les declaraciones de los responsables d'IX-BA-LV, que calificó de"gravísimes".

Recordó que'l procesu de "averamientu" coles distintes fuercies polítiques propuesta pol presidente, Vicente Álvarez Areces, pretendía facilitar el diálogu pa un presupuestu "necesariu" p'Asturies. Sicasí, dixo que nesti tiempu IX-BA-LV nun realizó "nin una sola propuesta concreta al Gobiernu.
Al so xuiciu, tovía hai "tiempu" pa llegar a un alcuerdu. Sicasí, entiende que les declaraciones d'IX-BA-LV que nun tienen voluntá política pa negociar y que van consumar les sos intenciones, espreaes en xunu, nel sentíu de que si nun entraben nel Gobiernu nun diben apoyar les cuentes rexonales.
Refugó los "insultos" d'IX, dalgo que consideró como un intentu de desviar l'atención ante'l "xaréu importante" que la formación política tien nel so senu.

Amás, Migoya negó que la FSA-PSOE tea bloquiando'l procesu.

Mui al contrario, Migoya esplicó que "nunca hubo tanta coordinación ente'l Gobiernu y el partíu", insistiendo en que l'Executivu ta "dafechu arropáu" pola FSA-PSOE. Sobre la reclamación d'IX-BA-LV de que'l Gobiernu-yos facilite la documentación sobre'l detalle de les partíes enantes d'entamar a negociar, Migoya dixo que ya se-yos remitió sufiente información y que tien de sentase a negociar pa poder entrar nesos detalles.
Migoya dixo que'l Gobiernu ya entregó a IX-BA-LV un volume de documentación "mui detallada", qu'incluyía les cifres de gastu y toles cifres macroeconómiques. Señaló que tamién se-yos remitió'l detalle de les diferentes partíes, polo que consideró "infundaes" les crítiques de la coalición. "Ta claro que nun quieren negociar, tán dando la espalda a los asturianos", dixo la conseyera.