ALLA y Podemos coinciden en que “el llogru de la cooficialidá de la llingua ha ser el noyu central de la llexislatura en materia llingüística”

|
Xosé Antón González Riaño, Pablo Martínez Testa y Nuria Rodríguez López xunta ALLA y Podemos

L'Academia de la Llingua Asturiana (ALLA) y Podemos aconceyaron en rellación a les propuestes programátiques en materia de política llingüística. La institución académica y la formación política coinciden en que “el llogru de la cooficialidá de la llingua (asturiana y eonaviega) ha ser el noyu central de la llexislatura”.

Na xunta, que forma parte de la serie d’entrevistes que l’ALLA tien previsto caltener coles fuercies polítiques con representación na Xunta Xeneral, participó Xosé Antón González Riaño xunto cola vocera de Podemos, Nuria Rodríguez López, y el coordinador del programa de Política Llingüística de la organización morada, Pablo Martínez Testa. El presidente de l’ALLA espunxo les actuaciones fundamentales que, al so criteriu, habríen empobinar l’aición política nos vinientes cuatro años en materia de llingua y cultura asturianes, algamando coincidencies.

Asina, tanto la institución académica como Podemos entienden que “el llogru de la cooficialidá de la llingua (asturiana y eonaviega) ha ser el noyu central de la llexislatura”, ensin escaecer otres midíes d’execución inmediata que cinquen a la presencia del idioma nos medios de comunicación, l’afitamientu de la llingua nel ámbitu escolar o la visualización institucional. La postura de la organización política difier dafechu de la qu’amosaba hai cuatro años, cuando evitaba falar de la oficialidá nos meses enantes de les eleiciones a la Xunta Xeneral, apostando agora de manera nidia pola igualdá de derechos de los falantes d’asturianu y gallego-asturiano colos de castellanu n’Asturies.

Na semeya, González Riaño, Martínez Testa y Rodríguez López.

Contador Estadistiques