Alicia González nun pudo finar la carrera nel Mundial d'Innsbruck

Pelayo Sánchez terminó'l 48 depués de tar gran parte de prueba junior en posiciones cabezaleres. El murcianu Alejandro Valverde llevó l'oru en categoría elite con 38 años.

Nun foi una bona esperiencia los Mundiales de Ciclismu en Carretera d'Innsbruck p'Alicia González (Movistar), que nun pudo finar la carrera. "Siempre ye guapo acabar la temporada con bon saborgu de boca..., pero esta vegada nun foi asina. Males piernes nun duru Mundial", espresó la de Viella en redes sociales tres la prueba que llevó con superiordá la holandesa Anna Van der Breggen, que sacó 3 minutos y 42 segundos a l'australiana Amanda Spratt y 5:26 a la italiana Tatiana Guderzo.

La durez de les carreteres del Tirol foi ensin dulda la carauterística principal de la competición en toles sos categoríes. En junior a Sánchez (Samuel Sánchez-MMR Cycling Academy) provocó-y un baxón nos quilómetros últimos tres tar tola carrera en primeres posiciones.

Finalmente'l de Teyego llegó a meta na posición 48 a 17:18 del ganador, el belga Remco Evenepoel. La plata foi pal alemán Marius Mayrhofer (1:25) y el bronce pal italianu Alessandro Fancellu (1:38).

Broche d'oru a una carrera

Na categoría elite masculina'l maillor arcu la vieya foi pa Valverde (Movistar), un trunfu que'l murcianu llevaba buscando tola so carrera y que raspió hasta en seis ocasiones: dos plates y cuatro bronces. Con 38 años el ganador de La Vuelta del 2009 superó nun sprint al francés Romain Bardet, al canadiense Michael Woods y al holandés Tom Dumoulin, que quedó fuera de les medayes tres l'esfuerciu fechu p'algamar al tríu de cabeza que finalmente xubió al podium.

Gráficu fechu por Tijmen Stam baxo llicencia CC BY-SA 3.0.