Algamar edita un discu nel que dellos grupos asturianos revisen y actualicen el cantar de chigre

|

Un total de quince bandes de rock, folk, pop y música d'autor participen nel discu ‘[Nuevos] Cantares de chigre’, qu’edita Algamar Producciones. Trátase d’un trabayu que busca revisar y actualizar el cantar de chigre tradicional.

“‘[Nuevos] Cantares de chigre’ naz como proyectu pedagóxicu y de recuperación que pretende llevar dellos de los cantares más populares asturianos a  les xeneraciones más moces col fin d’empapalos na tradición y la memoria colectiva d’Asturies”, apunten dende la discográfica fundada por Pablo A. Quiroga, que sigue nesti trabayu un mou d’operar asemeyáu al del discu homenaxe a Xentiquina, ‘Xentiquina Crew!’. Asina, cada artista o banda garra un cantar tradicional y llévalu al so terrén, dando-y una vuelta al orixinal.

El resultáu final son quince cortes que lleven la firma d’Alfredo González (‘Nel campu nacen flores’), Pablo Moro (‘Inés, Inés’), Crudo (‘Baxaben cuatro ayeranos’), Spanta la Xente (‘Dicen que van a poner’), Fe de Ratas (‘Chalaneru’), Skama la Rede (‘Rebolleres/Soi de Verdiciu’), La Tarrancha (‘De Tazones a Candás’), Bueno (‘Santa Bárbara bendita’), Bacotexo (‘Chufa Xixón a súa playa’), Seu (‘La barca marinera’), Duerna (‘Gasta la molinera’), Tania Pereira (‘Carretera d’Avilés’), La M de Matilde (‘Ayer vite na fonte’), Pyscho Rubia (‘Pastor que tas nel monte’) y Cilvrnigans (‘La romería de San Andrés). Esti discu, yá a la venta nos puntos habituales, presentóse’l sábadu con una espicha na sidrería xixonesa Chef Fidel y un conciertu posterior nel Musaeum cola participación de Psycho Rubia y del artista electrónicu Fruela 757.

 

Contador Estadistiques