Alerta polos riesgos de la regasificadora d’El Musel

La Coordinadora Ecoloxista preguntó-yos formalmente a los conceyos de Xixón y Carreño si tienen fechu daqué estudiu pola instalacion de la regasificadora d'El Musel, que va asitiase menos de 2.000 metros de núcleos de población como Xivares, Muselin, Xove, La Calzada, o'l Natahoyo.

El riesgu d'accidente, que pa la Coordinadora ye "nada despreciable" si se tien en cuenta qu'enriba d'El Musel ya tán los tanques de Butano de la Campa Torres, lo qu'amestao a la futura llegada de la terminal d'importación de Gas Natural Licuao, una planta que ye fácil que sufra incendios accidentales, pue llevar a accidentes que puen dañar a les poblaciones de la redolada. Nesti sentíu, los ecoloxistes apurren un llistáu d'accidentes graves que lleven asocediendo dende va cuarenta años p'acá con buques de gas y terminales de descarga d'esta sustancia, los más d'ellos rellacionaos con vertíos dende los barcos y tamién otros en tierra, dellos graves enforma como'l qu'asocedió nel Canadá nel 1972, cuando españó una planta de regasificación o'l de Staten Island (EEUU) nel añu 1973 al arreventar un tanque de gas averiáu, con 40 muertos. El más de recién de la llista ye del añu 2004, cuando en Skikda (Arxelia) españó otra d'estes plantes causando 27 muertos.