Aleguen contra los residuos d'Asturiana de Zinc

Asturiana de Zinc, una de les mayores industries que s'asitien na Ría d'Avilés, tien puestu un proyectu pa enanchar los sos depósitos de jarofix, una sustancia sobrante del procesu d'electrólisis pol que se fai el metal. Nel Colectivu Ecoloxista d'Avilés camienten que'l proyectu de la multinacional del zinc incumple delles normatives y, penriba de cualquier otra consideración, creen que'l jarofix nun ye la solución definitiva a la contaminación de la planta avilesina.

Hasta l'añu 2.001 los procesos d'electrólisis na factoría d'AZSA dexaben un residuu d'altísima toxicidá, la jarosita. Esti productu guardábase nunes balses especiales que tenía la compañía tres de la playa del espartal, pero va trés años, la compañía presentó un procesu pol que la jarosita convertíase en Jarofix, un productu sólidu y inerte que, al dicir de los sos técnicos, nun ye dañible pal mediu ambiente. AZSA entamó darréu a guardar el jarofix n'antigua cantera de L'Estrellín, a la otra oriella de ría au tien la fábrica. En teoría, la cantera tien sitiu pa guardar la producción de jarofix de venti años, pero la fábrica ta acabante de pidir permisu pa enanchar les concesiones que tenía apautaes pa posar más jarofix en previsión d'una xuba de la producción.

El Colectivu Ecoloxista d'Avilés presentó alegaciones a esti proyectu qu'entiende que lleva arreyaos dellos riesgos. En primer llugar, los ecoloxistes piden que tolo que se faiga seya acordies cola Declaración d'Impactu Ambiental del 2.000 sobre'l proyectu d'ampliación de la Fábrica de Zinc de San Xuan de Nieva. Los ecoloxistes sorrayen l'atención sobre'l puntu 10 d'esa declaración, que dexa bien claro que la producción de jarofix nun ye "una solución definitiva" y qu'AZSA tien obligación d'investigar o participar n'investigaciones p'alcontrar soluciones alternatives meyores que mengüen la cantidá de vertíos y que consuman menos materia prima, mayormente cal y cementu. Dende'l colectivu piden que la jarosita s'aprovechen les sos propiedaes como material de construcción como se fai n'otros países en cuenta d'usalo como esteril pa rellenar l'antigua cantera col agobiu que supón el trasiegu de camiones d'una oriella a otra de la ría pa posalo nes canteres de la marxe de la derecha.