Alegaciones ecoloxistes contra la térmica d'El Musel

La Coordinadora Ecoloxista d'Asturies presentó un escritu en Ministeriu de Mediu Ambiente dientro del plazu de consulta previa la evaluación d'impactu mediuambiental pal proyectu de central térmica a ciclu combináu que quier llevar alantre la empresa Endesa en puertu d'El Musel - Xixón.

El grupu conservacionista afirma que la empresa presenta la central térmica venceyándola a la creación de la regasificadora d'El Musel, una instalación que, al dicir de la Coordinadora, ta entovía pendiente del preste del gobiernu y que "va ser difícil que s'apruebe" pola cantidá de factores ambientales y de seguranza que diz qu'incumpliría.

L'impactu na calidá del aire na redolada de Xixón y Carreño, lo cerca que diba tar la térmica de núcleos de población nos que viven más de 70.000 persones y l'impactu sobre l'agua del ríu Aboño, que diz que diba recalentar afectando tamién a tola costa marina más allegada a la desembocadura del ríu centren tamién la refuga ecoloxista a la térmica de Xixón, amás de la presencia obligatoria d'una llinia d'alta tensión de 400 kv hasta Valliniello pa evacuar la corriente que se produza na central.