Alderique ente los dos candidatos de les primaries de Foro

Inaciu Iglesias y Isidro Martínez Oblanca participaron esti xueves nun actu colos militantes de Foro Xixón.

La charra-alderique, reservada namái a la militancia, desendolcóse nel salón del Hotel Alcomar, que s'enllenó a última hora, nun ambiente de cordialidá ente los dos candidatos a encabezar la llista de Foro al Congresu cola intención de caltener l'escañu actual. L'asturianista foi'l primeru en tomar la pallabra pa esponer los motivos pol que los militantes deberíen votalu'l 29 d'ochobre. Tres les sos pallabres y les de Martínez Oblanca, los presentes tuvieron la oportunidá de presentar les sos duldes a dambos candidatos.

Nel tramu final del actu, que s'allargó hora y media, llegó a la sala l'alcaldesa Carmen Moriyón xunto col so equipu de gobiernu, que nun pudo acudir al mesmu dende l'aniciu. Pa finar, Martínez Oblanca y Iglesias tuvieron cinco minutos pa concluyir les sos intervenciones.