Alcuerdu de collaboración ente l'Academia de la Llingua y el Colexu d’Inxenieros n'Informática

L'Academia de la Llingua Asturiana (ALLA) y el Colexu d'Inxenieros n'Informática d'Asturies (COIIPA) firmaron güei ún alcuerdu de collaboración ente les dos entidaes. L'intercambiu d'información y la celebración de seminarios, cursos y conferencies sobre temes d'interés común y nel ámbitu del espardimientu y normalización de la Llingua Asturiana nel mundu de les tecnoloxíes de la información y les comunicaciones son los principales puntos d'esti alcuerdu.

El documentu, que roblaron esta mañana la presidenta de l'ALLA Ana Cano y el Presidente del COIIPA Aquilino Adolfo Juan Fuente, espeya tamién l'intercambiu d'información sobre les actividaes de dambes entidaes, el desarrollu d'acciones de formación y l'afitamientu de canales d'espardimientu y promoción de servicios y actuaciones col envís de concienciar a los titulaos n'Inxeniería n'Informática y a los profesionales del sector en xeneral sobre aspectos rellacionaos cola Llingua Asturiana.

L'alcuerdu firmáu forma parte de la política pola que se manden les dos instituciones, en cuantes que mientres que l'ALLA tien firmaos convenios asemeyaos con instituciones como'l Conceyu de Xixón, el Colexu d'Inxenieros n'Informática vien de roblar otros convenios xenéricos asemeyaos con instituciones como la Fundación del Centru Tecnolóxicu de la Información y la Comunicación (CTIC) y cola Federación Asturiana de Minusválidos Físicos COCEMFE.