Alcuentros tradicionales de Trebolgu

Esta iniciativa de l'asociación cultural y folclórica
"Trebolgu" llega esti sábadu 21 de xunu a la so IV
edición, afitándose como una cita a nun escaecer del circuitu de
conciertos asturianos.



Pa esti añu l'asociación tenía pensao
ampliar les actividaes y asina como la duración d'estos alcuentros, que
ya tuvieron nel so escenariu a "Llan de Cubel", "Dixebra" o
"Kornog", pero la falta d'apoyu por parte de delles instituciones
obligó a la organización a nun poder facer espoxigar a los
alcuentros.



Anque, con too y con ello, el programa d'esti sábadu nun desmerez
al d'otros, xuegos pa neños y deportes tradicionales pela tarde gracies
a la presencia de "Seis Conceyos", y cuentacuentos a cargo de
Milio''l del Nido como antoxana de la nueche folk que va entamar a les 22:00
hores. El primer grupu en subise al escenariu van ser "Triba", grupu
avilesín que participó nel discu Xeneración Folk Volume IV
y que con incorporaciones na so formación inicial de namás de
tres persones, intenten facese un sitiu ente los grupos asturianos.

Depués d'ellos va tar
"La
Bandina", que ya ta preparando y tocando pieces nueves pa una posible
grabación d'un nuevu cd. Depués de los asturianos llega
l'aportación foriata qu'esti añu vien de la mano de
"Keltiac", esti ye un grupu formáu por músicos bretones
y escoceses Chris Dawson (xiblata y samplers), Frederic Bougouin (arpa),
Christian Lartigue (guitarra y voz), Dominique Chanteloup (percusiones), estilu
contundente el d'esti grupu onde l'arpa y les xiblates lleven el pesu
melódicu arropaos pola batería, guitarra y programaciones. Pa
finar el conciertu tan "Corquiéu", que presentarán
nesti conciertu dalgún tema nuevu nel so repertoriu.



El llugar de los alcuentros ye onde años anteriores, el parque
l'oeste d'Uviéu, y nun dexen de ser una perbona forma de calecer motores

pa la nueche de San Xuan.