Alcuentren el xen de la fala en neandertales del Sidrón

Les investigaciones nel yacimientu asturianu de la cueva del Sidrón llocalizaron el xen FOXP2, implicáu na llingua, en dos neandertales, lo que demuestra qu'estos prehitóricos tamién teníen fala y que, poro, ésta ya nun ye un fechu diferencial de la especie humana.
La revista científica Current Biology espublizó la recuperación del xen nel so últimu númberu.

Nel estudiu internacional participen los investigadores Carles Laluela, de la Universittat de Barcelona; Javier Forte y Marco de la Rasilla, de la Universidá d'Uviéu, y Antonio Rosas, del Muséu Nacional de Ciencies Naturales de Madrid.
La cueva del Sidrón data de 43.000 años, aproximadamente, y nella atopáronse más de 1.400 restos nendertales nunes condiciones de conservación perbones, gracies a les condiciones de permeabilidá del yacimientu.
Los 'homo neanderthalensis' son el grupu más cercanu a la especie humana actual y dixebráronse del 'Homo Sapiens' nos últimos 500.000 años. Según el nuevu estudiu de cambios xenéticos, los humanos modernos presenten dos cambios d'aminoácidu nel FOXP2, que ye lo que los diferencia d'otros primates y se desarrollen cola evolución de la llingua.