Alcontráu'l montañeru desapaeíu dende'l martes en Somiedu

L'afectáu, un home de 33 años d'edá, foi treslladáu al HUCA con policontusiones de pronósticu reserváu.

El Grupu de Rescate del SEPA, a bordu del helicópteru medicalizáu del organismu autónomu, treslladó al HUCA, n'Uviéu, al montañeru que se perdió ayeri martes cuando realizaba una ruta pelos llagos de Somiedu. 

L'afectáu foi alcontráu nuna pista al llau de la localidá de El Vaḷḷe que comunica La Ḷḷaguna con La Cueva. Efectivos de Bomberos del SEPA, GREIM, axentes  de la Guardia Civil y vecinos sacaron al afectáu en camiya hasta un prau onde amiyó l'helicópteru. Hasta'l llugar tamién se movió l'equipu d'Atención Primaria de La Pola con una ambulancia. Por cuenta de más pruebes y hasta nueva valoración médica l'home presentaba síntomes de hipotermia y policontusiones de pronósticu reserváu. 

El so localización llevose a cabu en recibiendo una llamada d'un particular, a les 16.45 hores, que taba caminando y sintió a una persona pidir ayuda. Nesi momentu avisó a unos vecinos que s'averaron hasta'l llugar y atoparon al mozu mancáu que confirmó la so identidá. 

Nesi momentu comunicó la localización a los miembros del equipu de busca que se treslladaron al llugar y pasóse l'avisu al SAMU (Serviciu d'Atención Médica Urxente) qu'unvió al llugar los medios sanitarios citaos enantes. 

Nes xeres de busca participaron Bomberos del SEPA de los parques de Proaza y Somiedu, el Xefe de Zona Centro, el Grupu de Rescate per tierra y tamién per aire, col helicópteru medicalizado, la Unidá Canina de Rescate, axentes de patrulla de Guardia Civil y del  GREIM (Grupu de Rescate ya Intervención de Monte) del Institutu Armáu y el  Guarda de Mediu Ambiente de Somiedu. 

El Grupu de Rescate, col mancáu, llegó al HUCA col helicópteru medicalizáu a les 18.50 hores.