Alcoa recortará la producción de la planta d’Avilés y de les otres dos d’aluminiu que tien n’Europa

La empresa estauxunidense Alcoa, con una planta n’Avilés, decidió reducir la producción de les sos factoríes europees de forma parcial y temporal. El recorte previstu tendrá llugar nel primer semestre d’esti añu.
 
Según indica la multinacional nun comunicáu, el Plan Global de Reestructuración del Negociu Primariu supondrá un recorte de la so capacidá de producción en tol mundu de casi’l 12 por cientu, 531.000 tonelaes. Les plantes afectaes n’Europa son, amás de l’avilesina, la d’A Coruña y la de Portovesme (Sardigna/Cerdeña). "Estes plantes tán ente les del sistema d’Alcoa con mayores costes de producción", asegura la compañía. La capacidá de producción total de Portovesme ye de 150.000 tonelaes, mentes que la d’A Coruña y Avilés son de 87.000 y 93.000 tonelades per añu, de manera respeutiva.
 
Na factoría asturiana, onde trabayen mediu millar de persones, y gallega fadráse un recorte parcial y temporal de la capacidá de producción. "La posición poco competitiva de la enerxía, xunto col incrementu de los costes de materies primes y la cayida del preciu del aluminiu, motiva’l recorte de la capacidá de producción prevista neses plantes", indiquen dende la empresa estauxunidense que, en Portovesme, aniciará un periodu de consultes para pesllar de forma permanente la planta. Nun sería la única decisión nesi sen de la multinacional, que la selmana pasada anunció’l zarru definitivu de la planta de Tennessee y de dos series d’electrólisis de la de Rockdale, en Texas.
 
“Na economía global actual, que cambia rápidamente, hai que responder de forma rápida pa mantener la competitividá", declara Chris Ayers, vicepresidente executivu d’Alcoa y presidente del negociu global de Productos Primarios de la compañía. "Tomóse esta decisión depués d’analizar toles alternatives posibles. Tamos comprometíos en trabayar pa buscar soluciones qu’embriva l’impautu nestes comunidaes y nos trabayadores", añade. Asina, Alcoa aniciará "de forma inmediata" consultes colos representantes de los emplegaos y les autoridaes competentes. El númberu total de trabayadores afectaos "nun se podrá determinar hasta que’l periodu de consultes concluya".
 
L’alcaldesa confía en que la reducción “dure’l tiempu menor posible”
 
Pilar Varela, alcaldesa d’Avilés, confía en que la decisión d’Alcoa de menguar la so producción "dure’l tiempu menor posible". La primer edil indicó, al traviés d’un comunicáu, que conoció la noticia de boca del direutor de la planta avilesina, Javier Menéndez, que treslladó-y la so intención de "acordar una solución que sía lo más corta posible nel tiempu y qu’afeute al númberu menor de persones de la plantiya”.
 
Pela so parte, Francisco Álvarez-Cascos reclamó al Ministeriu d’Industria, Turismu y Comerciu, tres conocer el plan d’Alcoa, qu’entame con urxencia la reestructuración del sistema tarifariu pa tener un coste enerxéticu "homologable" a otros estaos europeos y competitivu a nivel internacional col oxetivu de garantizar la viabilidá de sectores básicos. El presidente del país resaltó que’l sector del aluminiu rexistra cayíes relevantes nos mercados internacionales, circunstancia a la que s’añade la importancia de los costes enerxéticos como factor pa la llocalización de las plantes de producción. Poro, afirmó que la situación actual evidencia la pertinencia de la petición formulada hai unos meses pol Gobierno asturianu de facer reformes estructurales nel Estáu pa meyorar la competitividá de la industria básica y potenciar asina’l crecimientu económicu y l’emplegu.