Alba fala de “desllocalizaciones silencioses” n’Asturies

El profesor universitariu José Alba Alonso protagonizó la tercer conferencia de la Universidá Asturiana de Branu (UABRA). Na so intervención faló de “desllocalizaciones silencioses” nel país, poniendo l’exemplu d’Arcelor-Mittal.
 
“Mittal yá tomó un determín”, afirmó Alba, que tamién fixo referencia a Duro Felguera nel mesmu sen. Fechos como la xuba de la lletricidá o les tarifes del ‘superpuertu’ d’El Musel son dos de los motivos que, na so opinión, pueden llevar al empresariu indiu a dir abandonando, poco a poco, les sos plantes n’Asturies, como amuesen los paros en dalgunes llinies de producción o los retrasos nes obres de meyora previstes en Xixón. “Ye dalgo normal nuna economía de mercáu”, añade’l profesor universitariu, encargáu de dar una conferencia entitulada ‘Economía y Futuru n’Asturies’ énte los alumnos y alumnes de la UABRA y dalgunes persones interesaes.
 
Nel entamu de la so intervención, el profesor titular del departamentu d’Economía Aplicada de la Universidá d’Uviéu y especialista n’economía internacional y el desarrollo asociáu colos recursos naturales, y vicepresidente de l’Asociación Asturiana d’Amigos de la Naturaleza (ANA), fixo una esplicación de lo que ye la economía, amás d’un repás de la evolución de la economía asturiana nel sieglu XX y no que va del XXI. Asina, foi nomando les etapes que vivió’l nuesu país nesti tiempu, deteniéndose de forma especial na época que da aniciu na década de los 60 col principiu del desarrollismu. Depués vieno la crisis de los 70, la reconversión de los 80 y la llegada de les primeres multinaciones, la vuelta de tuerca que supunxo los 90 y l’alborecer económicu del sieglu XXI, hasta llegar a la crisis actual pola entrada de los bancos nel negociu inmobiliariu y industrial. Tamién destacó l’ausencia d’un lliderazgu positivu n’Asturies como una de les razones que nos llevaron a esta situación, poniendo como exemplu que na década de los 90 pasaren un total de cinco presidentes diferentes na Xunta Xeneral.
 
Sobre’l futuru d’Asturies, señaló que “les nueses posibilidaes pasen pol conocimientu de lo que somos quién a poner nel mercáu”. Asina, considera que s’acabó la época del modelu de les plantes grandes qu’acoyíen a miles de trabayadores y que “nun hai qu’esixir a les empreses coses que nun casen cola realidá mundial”. “Equí pidimos capital y llueu ponemos condiciones”, añadió Alba, que cree “perimportante valorar el nuesu patrimoniu inmaterial y saca-y réditu”. La creación d’una gran reserva de la biosfera cantábrica o, inclusive, la propia llingua asturiana, podríen ser dalgunes de les opciones poles qu’apostar pa revitalizar la economía del país. Por esi motivu, Alba punxo como exemplu al Marqués de Villaviciosa, Pedro José Pidal y Bernaldo de Quirós, impulsor del Parque Nacional de la Montaña de Cuadonga –el primeru del Estáu– tomando l’exemplu de los parques naturales estauxunidenses. “Vio que los americanos ofrecíen naturaleza y que nós, amás de naturaleza, tamién podíemos ufrir historia”, apuntó’l profesor universitariu.
 
Karaoke n’asturianu
 
L’actividá de la UABRA d’ayeri finó con una actividá bien prestosa entamada por Iniciativa pol Asturianu na discoteca Zaycor. Ésta tenía’l nome de ‘Búscase una estrella. Canta n’asturianu’ y nella participaron unos venti alumnos y alumnes de los cursos que se tán celebrando estos díes en Cangas del Narcea. ‘Chalaneru’, ‘Bocadillu Rock’, ‘Rapaza Nacionaliega’ o ‘Chacho’ foron dalgunos de los cantares entonaos polos concursantes nesti karaoke énte los aplausos de los sos compañeros y profesores. Como premiu, una botella de sidra, un diploma y dellos llibros n’asturianu.
 
Mañana’l coleutivu que trabaya pola normalización del idioma va dar a les 20 hores una charra informativa, acompañada d’audiovisuales, sobre la organización. Va ser tres la conferencia ‘Asturies ¿Paraísu Natural?’ de Carlos Lastra, presidente d’ANA, profesor titular del departamentu de Bioloxía d’Organismos y Sistemes de la Universidá d’Uviéu y académicu, prevista pa les 19 hores nel salón d’actos del IES de Cangas. Otra manera, esta nueche, a les 22.30 hores, Héctor Braga va actuar nel Teatru Toreno, tamién dientro de les xeres complementaries y abiertes de la UABRA.
 
Na semeya, Alba, Ana María Cano, Xosé Antón González Riaño y Pablo Xuan Manzano.