“Al ramu de nadal y al nataliegu recíbenlos fenomenal, hai que los presentar como dalgo que nun vien a sustituyir lo qu’hai”, apunta Vitu

“Soi mui optimista, creo que sos dos tradiciones asturianes que se tán recuperando”, respuende Víctor Raúl Pintado 'Vitu' al ser entrugáu pola revitalización n'Asturies d’elementos navidiegos como’l ramu de nadal o’l nataliegu, que vien cuatro años trabayando colos escolinos del CP Marcelo Gago d’Avilés. “Recíbenlos fenomenal, hai que los presentar como dalgo que nun vien a sustituyir lo qu’hai”, considera.

El ramu nadal y el nataliegu cada vegada tán más presentes nes cases asturianes. Dos tradiciones que foron perdiendo pesu na Asturies urbana pero que gracies al trabayu de difusión que tán faciendo nestos últimos años munches persones, yá sía n’escueles o en redes sociales, tán volviendo a garrar puxu.

Una d’estes persones ye Vitu, que lleva cuatro años faciendo más asturiana la Navidá de les escolines y escolinos del Marcelo Gago, asina como de les sos families, y tien asoleyaos llibros didáuticos como ‘Un nataliegu perbullindiegu’, con ilustraciones de Berto Álvarez Peña. Un llabor que desendolca na escuela xunto con otros maestros que yá tresciende les propies paredes del centru, como amuesa qu’esta Navidá na entrada de la Casa Conceyu haya un ramu de nadal y un nataliegu.

“Creóse lo que se llama un Equipu de Coordinación de Cultura y Llingua Asturiana, coordináu por dos persones, la mayestra de Llingua Asturiana de Primaria, Alexia Fernández Moure, y yo como representante d’Educación Infantil. Toles propuestes que se faen ye a nivel de centru y pa la Navidá lo qu’intentamos dar ye pesu a les dos tradiciones de calter etnográficu: el ramu nadal y el nataliegu”, esplica.

“Tolos años participamos nel concursu que fai l’Ayuntamientu d’Avilés, la Estaya de la Llingua, de ramos de nadal pa les escueles d’Avilés y comarca”, que ganaron esti añu y el pasáu, y decoren el centru con entrambos elementos como más significativos. “Y depués metemos siempre dalgún xuegu. Col nataliegu lo que solemos facer ye qu’ún o dos díes el nataliegu la entama, porque utilizamos el cuentu ‘Un nataliegu perbullindiegu’”.

Asina, “un día cuando lleguen los guah.es ta too tirao. Igual tán les sielles toes en suelu, la fariña de cocina pela escalera, el sofá de la entrada al revés, el nataliegu con un rodiellu na cabeza…”, colos “los dos natalieguinos pequeñinos de carbayu que tán al llau del ramu de nadal” como responsables”. “Implícase muncho tol colexu, por exemplu los bedeles de pela tarde y la llimpiadora, a la que-y presten toes estes coses”, nuna actividá que, como nun pue ser d’otra manera, vuelve llocos a les neñes y neños.

Pocu conocimientu previu

Entrugáu sobre’l conocimientu que trayía de casa la reciella d’estos dos elementos tradicionales de la Navidá asturiana, esplica que “poco”, y que ye na escuela ye onde tomen na so mayoría contautu con ellos, cola esceición d’una familia d’Illas que tamién collabora na recuperación del Antroxu Tradicional d’Avilés “que sí teníen conocimientu sobre ramos. La madre fixo una exhibición de cómo se facía un ramu, esplicando a los neños que ye’l propiu ramu’l que ta va pidiendo, una mazana o lo que sía. Esa idea un poco antigua de cómo a una cadarma de madera vamos dando-y lo que va pidiendo”.

Pero tanto’l ramu de nadal como’l nataliegu son bien recibíos. “Facemos una actividá plástica colos neños pa que lu lleven pa casa, igual facemos un ramu nada con palos de polu que van decorando ellos con pequeñes coses naturales, y lo incorporen nel so árbol de Navidá, o un nataliegu con magre que dexamos secar, y tamien lleven pa casa. Vamos faciendo coses pa que siempre vayan teniendo y según nos dicen les families nun los tiren, van guardándo y incorporándolu a la so Navidá”.

“Na mayoría de los casos acuéyenlo como dalgo mui positivo, pero hai que trabayalo, tienen que velo como dalgo atractivo tamién, non como dalgo que vien a sustituyir lo qu’hai”, analiza Vitu darréu. “Nosotros vamos facer otra propuesta, si vos apetez, que s’incorpora como dalgo más que vien a aportar”, esplica’l mayestru, optimista pola presencia que van garrando estos elementos añu a añu.

Un exemplu del so espardimientu ta nel llogru algamáu poles escolines y escolinos del Marcelo Gago esti añu al traviés del Programa Aprendizaxe-Serviciu, proyeutu interxeneracional puestu en marcha pol Serviciu de Mocedá del Conceyu. “La idea yera que los neños, depués de trabayar nel colexu toes estes tradiciones diba difundiles. Convidamos a la comunidá, al presidente de l’asociación de vecinos de La Madalena, porque’l colexu ta en La Madalena, un representante del Ayuntamientu, que vieno la conceyala, de los padres, al direutor del centru... Y los mesmos neños, nesti casu foron los de quintu y los de sestu, fixeron una presentación en PowerPoint esplicando toes estes tradiciones asturianes”, detalla.

“L’añu pasáu nun lo consiguimos, pero esti añu l’Ayuntamientu d’Avilés yá colocó un ramu nadal, fechu pol artista plásticu Miguel Mulero, y el nataliegu que fixera la Escuela de Cerámica d’Avilés va ponese al llau del ramu nadal na entrada, onde’l príncipe Aliatar recueye toles cartes a los Reis Magos, pa que tolos neños d’Avilés puedan velos y cuando faigan la semeya salga Aliatar y detrás tamién les nueses tradiciones más etnográfiques”, añade. Amás, ayeri celebróse na villa’l Cortexu del Nataliegu, con presencia de L’Anguleru y Lolina la Rulera.

La importancia de L’Anguleru

“Soi mui optimista, creo que sos dos tradiciones asturianes que se tán recuperando”, considera Vitu, qu’añade cómo’l ramu de nadal, amás d’en munches cases, tien presencia pública en sitios en conceyos como Grau o Villaviciosa. Al igual que L’Anguleru, del que diz tar mui sorprendíu “pola acoyida que tien, inclusive pola prensa”.

Vitu considéralu “un elementu perpotente a nivel didáuticu pa que los neños conozan les tradiciones asturianes más antigües” y por eso cuenta tamién con presencia nes actividaes que desendolquen. “Son personaxes nuevos, un cuentu de Navidá, que nos dan munchu xuegu. Tener un personaxe máxicu qu’entrega regalos como Papá Noel, al que nun sustituyimos... Nosotros dicimos que ye un collaciu de toos ellos, y nunes cases igual van los Reis Magos y n’otres va L’Anguleru a echar un gabitu a Papá Noel”, apunta al tiempu qu’esplica que “pretendemos que tenga una base histórica, garramos un anguleru de la ría d’Avilés, Varistu, que lu fiximos Llendador del Anguleru, y la xente fíxolu suyu como personaxe históricu”.

“Cada vez la xente se suma más, incluso los mayestros, que ye lo bono. Hasta va una década entrugaben qué trabayamos en Navidá, si a Papá Noel n’asturianu. Dimos-yos una alternativa con personaxes como L’Anguleru o Lolina la Rurela”, añade.

Pero recuerda que nun hai que pretender sustituyir a nada nin a naide, al tiempu qu’afirma “hai que ser lo más rigurosu posible, pero adaptaos al sieglu XXI”. Pon ehí l’exemplu de que “nun tenemos onde quemar el nataliegu, polo que convertímoslu nun elementu decorativu y nun pasa nada. Ponemos-y güeyos boca, a los neños-y presta...”.

Soluciones que, como amuesa’l casu del Marcelo Gago y d’Avilés, tán teniendo ésitu, ganando tanto’l ramu de nadal como’l nataliegu presencia pública y privada. Dos tradiciones cuasi perdíes, inclusive desconocies va unos años pa un sector ampliu de la población, que güei van forma parte de la celebración de munches families asturianes, en dalgunos casos per primer vez depués de décades.