Al Faro va ser el nome del proyeutu que convierte'l faru de Tapia nuna residencia d'artistes

La Conseyería de Cultura, Política Llingüística y Turismu, que se va encargar de la xestión, rescampla qu'esta iniciativa lleva "una denominación n'eonaviego".

El faru de Tapia, prendíu n'agostu del 1863, va convertise nuna residencia pública p'artistes de disciplines diferentes. L'Autoridá Portuaria d'Avilés va acondicionalu p'agospiar un centru d'estancias temporales pa creadores, una obra que supón una inversión de más d'un millón d'euros.

El plan de rehabilitación diseñáu por Cultura afita que l'inmueble caltenga la so función de señal marítima combinada cola de residencia que va servir d'estancia d'artistes de dientro y fuera d'Asturies que puedan convivir al traviés d'intercambios con entidaes y equipamientos similares d'otros llugares. Al Faro funcionará per aciu de programes d'estancia a lo llargo de tol añu, y contarán con financiación tanto pública como privada.

Les instalaciones disponen de seis amplios cuartos/camarotes pa ufrir agospiu a otros tantos artistas, una cocina-comedor que va funcionar tamién como llugar d'alcuentro y xuntanza, biblioteca, sala de música insonorizada y un taller d'artes plástiques. El diseñu arquiteutónicu xira al rodiu del patiu central, elemento protagonista pa componer un esquema coherente cola historia del edificio.

Depués de que nuna nota'l vienres la conseyería se refiriera al proyeutu como 'Al faru', provocando quexes de dellos coleutivos del occidente, como Agayo Eonaviego, que proponía l'usu de 'Pral Faro', o Axuntar, finalmente Cultura decidió emplegar 'Al Faro'. "El Gobiernu d'Asturias ratifica asina'l so firme compromisu cola proteición y promoción de la riqueza plurillingüística de la comunidá", apuntó ayeri nun comunicáu que corrixe, ensin citar, l'anterior.