Aína reclama al Gobiernu atrevimientu pa solicitar les competencies ferroviaries

"Diba ser daveres un pasu alantre y una declaración d’intenciones", apunta la formación, que propón midíes p'acabar "colos problemes de tresporte nos conceyos d'El Nalón".

La demanda de "un tresporte de calidá n'El Nalón" lleva tamién a Aína a reclamar al Gobiernu, "agora que l’AVE ye un tótem pa dalgunos de los políticos asturianos", que s'atreva a "garrar les competencies ferroviaries". "Queremos xestionar los nuesos servicios. Somos mayores d'edá, nun necesitamos que naide decida por nós. Por unes cercaníes asturianes de verdá", apunten.

El partíu asturianista pon el focu nesti asuntu aprovechando una iniciativa de l'agrupación d'El Nalón sobre los problemes de comunicación nesta cuenca, non diferentes a los que se viven n'otres zones del país. "Nin los autobuses nin los trenes furrulen como habríen facelo, provocando perxuicios continuos a les vecines y usuaries", denuncia.

Aína pon enriba la mesa una retafila de midíes p’acabar colos problemes de tresporte nos conceyos del valle, defendiendo dellos cambios nel sistema de tresporte, entamando cola llinia ente Riañu y Llaviana. "Reivindícase la vuelta a les frecuencies anteriores al andanciu del Covid y l’abaratamientu del preciu del billete urbanu, ún de los más altos d’Asturies", esplica.

Necesidá d'horarios afayadizos

La organización ve necesario tamién "una mayor coordinación ente servicios pa que nun se produzan esperes ente autobús y autobús. Anguaño, la xente de Samartín y Llaviana tien d’esperar hasta quince minutos cuando se posa del autobús que vien d’Uviéu pa llegar al so pueblu, yá que la metá de les llinies procedentes de la capital d’Asturies nin siquier lleguen a L’Entregu".

Los problemes danse tamién coles comunicaciones con otros puntos del país. "La meyora de los servicios de tren y autobús con Xixón y Uviéu ye una reclamación xeneral ente les vecines y vecinos, apostando pol aumentu de les frecuencies o’l final de les obres del soterramientu", rescampla.

La formación de creación nueva presenta nes sos redes sociales documentos gráficos coles diferentes midíes propuestes más detallaes.