Aína fai propuestes a los Presupuestos en seis exes que defenden los servicios públicos y l'entamu d'aiciones pa poder "vivir n'Asturies"

Coincidiendo col alderique del proyeutu de llei de Presupuestos, que va siguir el vienres col Plenu final coles enmiendes parciales que se pueden presentar hasta’l miércoles a les 10 hores, Aína fai propuestes en seis exes que “defenden ensin condiciones los servicios públicos y les aiciones enfotaes a que quien quiera, pueda vivir n’Asturies”. La formación asturianista cuestiona parte del so conteníu.

Infraestructures; trabayu y vivienda; fiscalidá; ciencia y cultura; educación y sanidá; y feminismu son los seis pegollos sobre los qu’Aína fai propuestes xenerales de cara a les cuentes en tramitación. Aiciones coles qu'aprovechar los Presupuestos más altos de la historia d’Asturies.

“Aína nun escaez la necesidá de xenerar puestos de trabayu en concondiciones dignes y abondes. Los Presupuestos han reflexar inversiones efeutives, nel mesmu sen que faciliten l’accesu a la vivienda pa la mocedá y les persones en situaciones económiques más difíciles”, apunta en primer llugar el partíu, que reivindica “eliminar los conciertos y medrar les dotaciones económiques y humanes pa garantizar la calidá de los servicios en toles especialidaes y etapes, tamién na rede del ERA, l’atención a la dependencia y el curiáu de la infancia”. Les cuestiones fiscales “han avanzar col mesmu enfotu, nunca nun dando pasos atrás p’algamar la financiación qu’estos servicios precisen, ye dicir, que paguen más los que más tienen”.

No tocante a les propuestes feministes, apuéstase por “desendolcar polítiques efeutives pela totalidá del territoriu, trabayando p’amenorgar la brecha salarial y aumentando la rede de Centros Asesores de la Muyer, con prioridá de les zones rurales, y de Centros d’Atención Integral a muyeres víctimes de violencies machistes, ente otres aiciones”. Rescámplase la importancia d’ameyorar estos servicios, “equiparando y diversificando’l personal cualificao”.

El partíu asturianista reclama, amás, “inversiones reales y efeutives” en ciencia y cultura “que sofiten l’espoxigue de dambos seutores pa construyir un país meyor”. D’igual forma convida al Gobiernu a “actuar más alló de los Presupuestos, trabayar pa regular los precios de los alquileres, ameyorar l’Atención Primaria, defender a les trabayadores nos conflictos llaborales y tratar con dignidá les llingües d’Asturies, ente otres aiciones, porque, recuerden: los númberos importen, pero nun lo son too”.

Na semeya, llápiz de memoria col proyeutu de llei de Presupuestos Xenerales pal 2024 que'l conseyeru de Facienda y Fondos Europeos, a la derecha, entregó na Xunta Xeneral al presidente del Parllamentu, Juan Cofiño.