Aína convoca a la so militancia pa decidir si se presenta'l 23-X

Va celebrar una Asamblea Nacional Estraordinaria nel uvieín Centru Social Naranco na que se permite la participación telemática.

La I Asamblea Nacional d'Aína, que tuvo llugar el 25 de febreru, decidió nun presentase a les eleiciones del 28-M al entender que yera daqué prematuru, dando prioridá a consolidar el trabayu desendolcáu nesi tiempu. El sorpresivu adelantu de les xenerales, previstes de primeres p'avientu, al 23 de xunetu fechu al día siguiente de la xornada eleutoral pol presidente del Gobiernu estatal, Pedro Sánchez, lleva agora a la formación asturianista a convocar otra vuelta a militancia pa decidir la postura política pa esti 23-X.

La cita ye'l domingu a les 17 hores nel Centru Social Naranco, actu acutáu pa les persones afiliaes. Esta Asamblea Nacional Estraordinaria va tener un calter participativu, permitiendo l’asistencia al traviés de medios telemáticos y sintiendo la voz de cualesquier militante que quiera intervenir.

El lema de la mesma ye 'Decidimos xuntes el camín'. "Ye bona amuesa de la visión del partíu. L’oxetivu ye convertir esti actu en dalgo más amplio qu’una votación: nun intercambiu d’idees sobre Asturies y sobre’l proyeutu políticu d’Aína", apunten dende la formación.

Na semeya, votación celebrada na I Asamblea Nacional d'Aína sobre la participación del partíu'l 28-M.