Ahmadineyad declara que los países occidentales mataron a Muamar Gadafi “pa que nun falara”

Mahmud Ahmadineyad, presidente d’Irán, acusó a los países occidentales de buscar la muerte de Muamar Gadafi “pa que nun falara”. El Conseyu Nacional de Transición (CNT) libiu enterró al ex dirixente nun llugar secretu.
 
"Enséñenme a un solu presidente européu o americanu que nun viaxara a Libia o que nun firmara dalgún acuerdu" con Gadafi, afirmó Ahmadineyad nun discursu televisáu en direutu nel qu'acusó a les potencies occidentales d'orquestar la muerte del ex mandatariu libiu. "Hai quien diz que mataron a esti caballeru p'asegurase de que nun falaría, igual que fixeron con Bin Laden", prosiguió.
 
Según el presidente iranín, el Conseyu de Seguridá de la ONX ye "una organización ensin honor". Asina, Ahmadineyad entiende que la resolución sobre Libia valió p'autorizar una misión col oxetivu de "saquiar" el petroleu libiu. "Cualquier decisión que refuerce la presencia, el dominiu o la influencia de los estranxeros ye contraria a los intereses de la nación libia", aseveró, pa depués añadir que "lo que'l mundu espera de la nación libia ye que se caltenga firme y xestione'l so país por sí mesma".
 
Otra manera, el CNT enterró güei “colos debíos respetos” a Gadafi y al so fíu Motassim nun llugar desconocíu. Fuercies lleales al Conseyu debatieron sobre qué facer col cuerpu de Gadafi hasta que la so descomposición obligó-yos el llunes a acabar cola esposición del cadabre y dar sepultura a los cuerpos.