"Aguardo que'l Conceyu contribuya a que los estudios de filoloxía asturiana seyan un poco meyor”, apunta Cano

Ana María Cano señaló nel entamu de les XXX Xornaes Internacionales d’Estudiu qu’aguarda que’l Conceyu de Toponimia contribuya “a que los estudios de filoloxía asturiana seyan un poco meyor”. La decana Valdés participó nel actu.

Na so intervención, la presidenta de l’Academia de la Llingua Asturiana (ALLA), destacó’l cumplimientu del trenta aniversariu de les xornaes, “lo que supón un ésitu de por sí”. “Nunca hubo interrupciones y siempre hubo respuesta del públicu, lo que ya pa tar arguyosos, anque siempre hai coses que meyorar”, apuntó Cano.

Nesta ocasión, pese a que suelen ser de temática llibre, les xornaes tán llendaes al estudiu de la onomástica y la toponimia, dalgo que nun se repetía “dende la cuarta edición, nel 1985, cuando foron monógrafiques sobre la toponimia asturiana. Por eso creímos qu’agora yera’l momentu” afayadizu pa celebrar un Conceyu Internacional de Toponimia y Antroponimia Asturiana. Por último, Cano comentó que “aguardo que’l Conceyu seya granible y que contribuya a que los estudios de filoloxía asturiana seyan un poco meyores”.

Pela so parte, la decana de la Facultá de Filosofía y Lletres, Cristina Valdés, calificó de “momentu importante” la celebración de les XXX Xornaes Internacionales d’Estudiu nes instalaciones de la facultá y destacó que “ésta tien una responsabilidá pa colos estudios asturianos”. Tres estes intervenciones, Xavier Terrado Pablo abrió’l ciclu de ponencies y comunicaciones con una charra sobre’l ‘Léxicu románicu arcaico na toponima catalana y asturiana’. Nella, el profesor de la Universitat de Lleida esplicó, con dellos exemplos, cómo la toponimia ye fonte de conservación d’arcaismos románicos.

La primer xornada de les trés que componen el Conceyu completóse cola participación de Martín Sevilla (‘Los topónimos asturianos Taloca/Camoca’), Xabiel Fernández García (Oiconimia asturiana. La casa como elementu vertebrador del sistema socio-económicu tradicional’), Francisco Javier Redondas Maseda (Rasgos toponímicos nel Suroccidente Astur’), Pablo Suárez García (‘La deturpación toponímica n’Asturies), Xosé Lluis García Arias (‘Documentación asturiana y toponimia’) y Alda Rossebastiano (‘La onomástica en la Universidad de Turín’), profesora de la Università degli Studi di Torino. Por último, presentóse a los participantes nes xornaes el númberu 105 de ‘Lletres Asturianes’, na so versión dixital, y el primer númberu de la revista dixital ‘Ciencies. Cartafueyos Asturianos de Ciencia y Teunoloxía’, que va tar a disposición de tolos interesaos mañana nes web de l’ALLA y de la Universidá d’Uviéu.    

Na semeya, Cristina Valdés, Ana María Cano y Xavier Terrado.