Agroganadería firma convenios de collaboración colos criadores pa caltener les races autóctones

La Conseyería d’Agroganadería y Recursos Autóctonos destina esti añu 799.640 euros al caltenimientu de les races autóctones, 360 euros menos que nel 2013. María Jesús Álvarez firmó ayeri los convenios colos criadores.

 

L’oxetivu d’estos alcuerdos ye mantener los llibros xenealóxicos y el desarrollu de los programes de conservación de caún d’elles. “Van ayudar a caltener un trabayu que se vien faciendo nos años últimos”, emponderó la conseyera, que destacó l’esfuerciu económicu del Gobiernu por continuar “en tiempos de crisis” con estes ayudes a unes races que “nos años últimos casi llegaren a la llende del so desaniciu”. D’igual forma, aseguró qu’esti sofitu a les races autóctones va continuar nos años próximos.

 

Toles asociaciones ven aumentada de manera pequeña l’aportación económica del Gobiernu, a esceición de l’Asociación de Criadores de Ponis de Raza Asturcón (ACPRA) que pasa a recibir 118.240 euros, 8.440 menos que nel 2013 (el total yera de 126.680 euros). L’Asociación de Criadores de Pita Pinta Asturiana (ACPPA) va ingresar 4.568 euros, lo que supón 888 más; l’Asociación de Criadores de Gochu Asturcelta (ACGA), 15.663 euros, 983 más; l’Asociación de Criadores de Cabra Bermeya (ACRIBER), 13.560 euros, 1.880 más; l’Asociación Española de Criadores de Ganado Vacuno Selecto de Raza Asturiana de los Valles (ASEAVA), 481.450 euros, 1.450 más; l’Asociación Española de Criadores de Ganado Vacuno Selecto de Raza Asturiana de la Montaña (ASEAMO), 133.330 euros, 1.730 más; y l’Asociación de Criadores de Oveya Xalda d’Asturies (ACOXA), 32.829 euros, 1.149 más.

 

Pela so parte, Asturiana de Control Lechero (ASCOL) recibe, por mor d’otru conveniu firmáu nel mesmu actu, 436.000 euros pal desarrollu d’un programa de meyora xenética de la cabaña ganadera asturiana de raza frisona. Poro, el total repartío ayeri pola conseyería ye de 1.235.640 euros.

 

Na semeya, Álvarez y Rosa Urdiales, direutora xeneral de Ganadería, colos representantes de los criadores.