Agroganadería firma convenios coles asociaciones de criadores pa sofitar les races autóctones

La Conseyería d’Agroganadería y Recursos Autóctonos robló esti xueves convenios colos coleutivos de criadores pa potenciar les races autóctones y apoyar la competitividá de les esplotaciones. Les ayudes sumen un total de 800.000 euros.

Esta cantidá va destinase al caltenimientu del llibru xenealóxicu y el desendolcu del programa de conservación de caúna de les races propies del país pa esti añu. La conseyera, María Jesús Álvarez, emponderó’l trabayu de los criadores, que "contribúi al mantenimientu de la biodiversidá y la meyora y competitividá económica de les actividaes ganaderes", y destacó l’esfuerciu fechu pola Alministración asturiana pa compensar la baxada de les ayudes procedentes del Ministeriu d’Agricultura, Alimentación y Medio Ambiente, anque lo cierto ye que, menos el vacunu, el restu de races reciben menos perres del Gobiernu d'Asturies que l'añu pasáu

El repartu de los 800.000 euros ye’l siguiente: pa l’Asociación de Criadores de Pita Pinta Asturiana (ACPPA), 3.680 euros; pa l’Asociación de Criadores de Gochu Asturcelta (ACGA), 14.680 euros; pa l’Asociación de Criadores de Cabra Bermeya (ACRIBER), 11.680 euros; pa l’Asociación Española de Criadores de Ganado Vacuno Selecto de Raza Asturiana de los Valles (ASEAVA), 480.000 euros; pa l’Asociación Española de Criadores de Ganado Vacuno Selecto de Raza Asturiana de la Montaña (ASEAMO), 131.600 euros; pa l’Asociación de Criadores de Oveya Xalda d’Asturies (ACOXA), 31.680 euros; y pa l’Asociación de Criadores de Ponis de Raza Asturcón (ACPRA), 126.680 euros. Pela so parte, Asturiana de Control Lechero (ASCOL) recibe, por mor d’otru conveniu firmáu nel mesmu actu, 436.000 euros pal desarrollu d’un programa de meyora xenética de la cabaña ganadera asturiana de raza frisona.

La cantidá total de les ayudes ye, polo tanto, de 1.236.000 euros, mayor que nel 2012, cuando se situaron en 1.086.300. Sicasí, les cantidaes a los criadores de pita pinta, gochu asturcelta y cabra bermeya, ye menor, yá que l’añu pasáu’l conveniu de collaboración ascendía a 26.442 euros pa cada coleutivu. Tamién mengua lo que reciben los asturcones, al pasar de 162.822 euros a 126.680, y la oveya xalda, que baxa de 39.748 euros a 31.680. La única cabaña que ve ameyorada les cantidaes a recibir ye la vacuna: l'Asturiana de los Valles pasa de 338.178 euros a 480.000; l'Asturiana de la Montaña, de 93.138 euros a 131.600; y el programa pa la raza frisona, de 373.088 euros a 436.000.