Adolfo García afirma que los grupos folclóricos d’Uviéu “son unos privilexaos” pol tratu que reciben

El direutor teúnicu del programa ‘Folclor na cai’, Adolfo García, aseguró na presentación de la edición d’esti añu que los grupos de la ciudá “son unos privilexaos” pol tratu recibíu del Conceyu. Na so opinión, los d’otros sitios “tán pasándolo mal”.
 
García, que tuvo acompañáu na presentación por Agustín Iglesias Caunedo, teniente d’alcalde, aseguró que son munches les agrupaciones folclóriques d'otros puntos d'Asturies que llamen a les puertes de la Casa Conceyu “pa poder actuar n'Uviéu”. D’igual forma, tamién destacó'l compromisu del gobiernu municipal pa col folclore asturianu, que “tien un llugar bien importante na ciudá”, afirmó.
 
El ‘Folclor na cai’ del 2011, que tien un presupuestu de 133.400 euros, va contar con cerca de 200 actuaciones de bandes de gaites y grupos de baille tradicional. La Banda Gaites La Laguna del Torullu, el Grupu de Baille Xuno –dambos de San Cloyo–, la Banda Gaites del Centru Asturianu y el Grupu Finlandón van ser los encargaos d’abrir esta fin de selmana la edición d'esti añu.