Adolfo Camilo Díaz torna a la novela prieta cola obra ‘Espankin’

Suburbia Ediciones edita la creación última d’Adolfo Camilo Díaz. Trátase de ‘Espankin’, obra cola que l’autor de Caborana torna a cultivar el xéneru de novela prieta. Esti vienres presenta esti trabayu na FNAC.

“‘Espankin’ ye la crónica de la cayida nos infiernos de Gloria, maestra de clase media con una vida perfecta. L'accidente d'una de les sos alumnes y la apaición de unes semeyes van facer que la so vida se taramielle porque, ¿quién y por qué quier facela dañu?”, detallen dende la editorial sobre la obra de Camilo Díaz, ún de los autores más polifacéticos de la escena cultural asturiana. L’ayerán ye’l creador d’obres tan emblemátiques como ‘Añada pa un güeyu muertu’ (1985), ‘Diariu de viaxe’ (1996), ‘Imago’ (2007) y ‘Advenimientu’ (2009), les cuatro premiaes col Xosefa Xovellanos. Tamién firmó otra gran novela prieta como ‘Miénteme, dime la verdá’ y delles obres de teatru como ‘Psicokiller’, ‘País. Una traxicomedia asturiana’ y ‘Wulf’ (Premiu de Testos Teatrales Alejandro Casona 2005). Nesti tiempu últimu, l’ayerán tamién ta mui metíu nel mundu musical col so proyeutu ACD. Inclusive, ún de los sos cantares, ‘La güela’, ye finalista al VII Premiu al Meyor Cantar.

Esta tarde, a les 19 hores, Adolfo Camilo Díaz va tar presente na FNAC (Parque Principado, Siero), pa presentar esta obra. Xandru Fernández va acompañalu nel actu.