L'autor ayerán presenta esti vienres un llibru que fai estoyu de les sos meyores contribuciones en prensa dende va un cuartu de sieglu p'acá.
"Articulo mortis" ye una antoloxía que recueye 25 años de tribunes, artículos d'opinión y tou tipu de collaboraciones escrites orixinalmente pa revistes y medios de comunicación de toa triba, bien d'ellos yá desapaecíos. La editorial Madú ye la responsable d'esta edición qu'axunta lo meyor de la producción articulística del autor de "Añada pa un güeyu muertu" ente 1980 y el 2005, 37 escritos que salieron de la esbilla de más d'ochocientos testos que falen de temes rellacionaos cola cultura del so tiempu y qu'esmolecieron nel so día al autor. Los llinguaxes urbanos, el cine, la lliteratura o la política asómense peles fueyes d'esti llibru que-y val a Adolfo Camilo Díaz pa sacar en claro que "paez que nun pasa'l tiempu" en cuantes que "les más de les polémiques y asuntos que se traten na obra siguen d'actualidá y prácticamente ensin avances 25 años dempués".
La presentación del llibru va tener llugar el vienres día 30 d'avientu a les 7 de la tarde nos salones del local "La Escandalera" que s'asitia nel edificiu del termómetru d'Uviéu, na Cai San Francisco d'Uviéu.