Adizión Etílika ta grabando discu nuevu, el primeru dafechu n’asturianu

‘Bomba reloxería’ ye’l nome del trabayu nuevu d’Adizión Etílika, banda que tien espublizaos dos discos y una maqueta. El grupu ḷḷenizu entró a grabar esti llunes nos estudios Dynamita de Llugones un discu que va ser dafechu n’asturianu.
 
Pese a que nos trabayos anteriores del grupu la llingua’l país tuvo un papel importante, nesta ocasión la banda de Ḷḷena decidió apostar por facer cantares namái n’asturianu. Once temes que beben del hardcore, metal y rock y nel que los sos siguidores van alcontrar dalguna collaboración, como la de Pirri, vocalista d’Escuela de Odio.
 
Adizión Etílika tien yá una llarga trayeutoria musical, con 8 años de vida y más de 100 conciertos n’escenarios d’Asturies, Catalunya, País Lleonés, Euskadi o Cantabria. Nesti tiempu, los ḷḷenizos asoleyaron una maqueta (2004) y los discos ‘Heridas de mina’ (2006) y ‘Del otru llau’ (2008). ‘Bomba reloxería’ tará disponible al públicu nel mes de xunetu.