Adelantar la última xuba a les 17 hores y venta anticipada, propuestes últimes pa ordenar el tráficu a Los Llagos

La midida que prohíbe l'accesu a los vehículos particulares va entar a valir la selmana qu'entra, pendiente d'espublizase nel BOE.

Responsables y téunicos de la Conseyería de Fomentu, Cooperación Llocal y Prevención de Quemes; el Conceyu de Cangues d'Onís; la Direición Xeneral de Tráficu (DXT); y la empresa concesionaria, ALSA, caltuvieron güei un aconceyamientu telemáticu p'avanzar nes mídes p'amenorgar la intensidá de tráficu na carretera d'accesu a Los Llagos. Nelles el Gobiernu plantegó adaptar les frecuencies y reducir los horarios de xuba de los autocares del Plan Especial de Tresporte, de les 19 hores actuales a les 17, esto ye, adelantalo dos hores.

La reorganización de las frecuencies pasaría por potenciar la venta anticipada de billetes cola fin d'axustar al máximu el núbmeru de trayeutos. L'oxetivu sería llograr, de manera progresiva, que'l 100 por cientu de los boletos se vendan de forma previa.

Estes midíes nueves añadiríense a les alcordaes la selmana pasada pa "siguir avanzando nel ameyoramientu de la organización y redistribución de l'afluencia de visitantes al espaciu natural y na reducción d'intensidá de tráficu y de los crucies ente vehículos de tresporte de viaxeros". La más importante tomada, la prohibición del accesu a los vehículos particulares non autorizaos, ta entovía pendiente d'entrar a valir, lo que va producise la selmana qu'entra.

Imaxe del autocar accidentáu, colos servicios d'emerxencia n'aición. Semeya propiedá del 112 Asturies.