'Ad-vientu' gana'l premiu del públicu del Día d'Asturies del FICXixón

La única cinta en llingua asturiana a concursu d'esta estaya foi la que más prestó a los asistentes. El xuráu quedó con 'Nocturno'.

Gran parte del equipu de 'Ad-vientu', comandáu polos sos direutores Roberto F. Canuto y Xiaoxi Xu, tuvieron presentes el vienres na sala 4 de los Cines Centro, onde se celebraba la segunda sesión del Día d'Asturies del LIV Festival Internacional de Cine Gijón (FICXixón) y, al empar, tenía llugar l'estrenu mundial d'esti curtiumetraxe asturchinu rodáu n'Asturies y en llingua asturiana. El pase prestó a los asistentes, como amosó'l que'l públicu escoyera a la producción d'Almost Red Cultura Communication Co. como la meyor de toles presentaes a concursu.

El xuráu, pela so parte, decidióse pola cinta 'Nocturno' de Jorge Dopacio. Ésti tuvo conformáu por Antonio Virgili, direutor xeneral de RTPA, y Rodrigo Sopeña y Isabel Friera. Otra manera, na seición oficial del FICXixón, la película ganadora foi la búlgura 'Glory', de Kristina Grozeva y Petar Valchanov.