Activistes de Greenpeace entren a les sedes centrales del PSOE y PP pa pidir el fin de la enerxía nuclear

Dos grupos d’activistes de Greenpeace entraron na mañana d’esti xueves vistíos de blanco a les sedes centrales del PSOE y PP pa pidir el fin de la enerxía nuclear nel Estáu. Esta aición foi simultánea y pacífica.
 
“La situación de la central nuclear de Fukushima sigue descontrolada depués de casi dos selmanes y grandes cantidaees de radiactividá que ya s’emitieron a la atmósfera. ¿Hasta ónde tán dispuestos a llegar los partíos políticos pa defender la enerxía nuclear? ¿A qué tán esperando? Si pasó en Xapón tamién podría pasar n’España, pues tenemos el mesmu tipu de reactores”, considera Carlos Bravo, responsable de la campaña Nuclear de Greenpeace, tres l’aición del coleutivu ecoloxista en Madrid. Ésta consistió na entrada d’activistes, vistíos totalmente de blanco –dalgún tamién con mázcara antigás–, nes sedes centrales del PSOE y PP. Na primera, taparon el cartelu de la entrada con una pancarta col lema ‘No más Fukushima. Nucleares cierre ya’, mentes que na del PP accedieron al primer pisu pese al que los trabayadores de la sede popular trataron d’impedilo.
 
Les demandes que fai Greenpeace a los dos partíos son un plan de pieslle progresivu pero urxente de les centrales nucleares, principiando pol pieslle inmediatu de les centrales nucleares de Garoña y de Cofrentes, con reactores similares a los de Fukushima; una revisión al alza de los oxetivos actuales d’enerxíes renovables pal 2020, de forma que pa esi añu al menos el 50 por cientu de la electricidá nel Estáu se xenere mediante enerxíes llimpies, y el 100 por cientu enantes del 2050; una llei d’aforru y eficiencia enerxética; la cancelación del procesu de construcción del cementeriu nuclear centralizáu; l’instauración d’un réxime de responsabilidá civil nel que l’esplotador de les instalaciones respuenda de manera illimitada en tiempu y cuantía de los daños fechos; y la realización de ‘stress tests’ obligatorios pa toles centrales nucleares.