Acabó’l debate na Xunta Xeneral

El grupu Socialista y el d'IX-BA refugaron toles 103 propuestes que presentare'l PP nes conclusiones Debate sobre l'Estáu de l'Autonomía Asturiana, mientres que los populares votaron al favor de nueve propuestes de los partíos en gobiernu, nenguna d'elles de trescendencia.

Nenguna de les propuestes que s'aprebaron ayeri falaba del Salariu Social, motivu de tensión ente los socios de gobiernu. La normalización de la llingua asturiana foi otra de les grandes ausentes xunto col funcionamientu del Ente de Comunicación autonómicu nun paquete de conclusiones que trata de la defensa de la minería, del problema llaboral de Menasa, cambeos na financiación de los conceyos, la estensión a Asturies de les ayudes del Gobiernu central pola seca, un plan estratéxicu d'apoyu a l'agricultura ecolóxica, el sofitu a l'autovía con Ponferrada, la mayor promoción d'Asturies como destín turísticu y la meyora de les telecomunicaciones, que'l PP votó al favor anque dixo que tenía mieu de qu'en realidá valiere pa da-y más financiación a la TV autonómica. Ensin el votu al favor del PP salió alantre otra propuesta que pide que se caltenga l'añu qu'entra'l Plan Especial d'Accesos a Cuadonga

Pela parte del PP, ente les sos más de cien propuestes, los populares pidíen la retirada del recargu sobre los combustibles y deducciones nueves nel IRPF o que los llibros de testu fueren de baldre y que s'implanter nos centros d'enseñanza'l billingüismu castellanu-inglés, unes propuestes que PSOE y IX-BA consideraron que yeren más afayadices de tratar en plenos y comisiones parlamentaries por tratar temes demasiao concretos pa un debate d'orientación política.