ACA va denunciar al xefe de Patrimoniu d’Asturies pol derribu de dos hórros en Corvera

L'Asociación de Colectivos Asturianos (ACA) y la plataforma Cultural "La Foz del Pielgu" de Corvera presentaron ayeri una denuncia contra'l xefe de Patrimoniu de la Conseyería de Cultura, Ignacio Alonso, al qu'acusen de prevaricación por "autorizar el derribu de dos hórros y una panera en Truyés (Corvera) nel llugar onde se desarrollaben les obres de la urbanización "los balagares". ACA, asociación declarada d'interés públicu y que tuvo representada na rueda de prensa pol so dirixente, Txomin Goñi, va ser quien faiga la denuncia dempués de recibir información de la plataforma pol patrimoniu cultural de Corvera "La Foz de Pielgu", que dirixe Xosé Xicu Mata.

El derribu de los horros y paneres de Truyés tuvo llugar el mes d'abril del pasáu añu 2006. La plataforma cultural denunciare públicamente nel so momentu que'l Conceyu de Corvera solicitare un espediente de ruina sobre los restos etnográficos pa poder llegalizar el so derribu. La plataforma aseguraba que les construcciones, un conxuntu de dos paneres y dos horros apegaos al traviés d'un corredor inda presentaba bona condición y que namás precisaben de llabores menores de remocique pa ser a caltenese. La Plataforma corverana asegurare tener conocimientu de que l'espediente de Truyés se retirare de manes del responsable que nel so día emitiere opinión contraria al derribu pa pasá-ylu a otra instancia más favorable al estrozu de los horros, que finalmente llevó alantre la empresa constructora Dolabay-Erma.