ACA convoca una manifestación contra la especulación urbanística

L'Asociación de Colectivos Asturianos (ACA) convoca una manifestación en Xixón pal próximu día 21 baxo'l lema "La especulación destruye Asturies". La marcha va salir de la plaza l'Umedal de Xixón a la una de la tarde.

ACA, plataforma na que s'inxerten más de venti colectivos de vecinos y asociaciones de tou tipu de tola xeografía asturiana, dende l'Asociación d'Amigos y Vecinos de Llanes hasta la plataforma contra'l tresvase d'Arbón nel occidente, quier denunciar al convocar esta manifestación "la venta de la nuestra tierra como segunda residencia al meyor postor".

ACA diríxese a los ciudadanos nun tonu mui directu pa que se movilicen "contra les espropiaciones de lo tuyo y lo de los tos vecinos pa facer xalés y campos de golf" acusando a "políticos y constructores" de "facer los planes d'infraestructures p'Asturies según-yos convién".

La manifestación va facer bandera tamién de la protesta contra la destrucción de los montes, parques naturales y propiedaes que lleva arreyada la instalación de llinies d'alta tensión.

Ello ye que la planificación eléctrica del Gobiernu asturianu ye otru de los pegoyos de la protesta que s'opón igualmente "a la regasificadora de El Musel y les centrales térmiques que contaminen y estropien el paisaxe".