Ábrese la matrícula pa la prueba de conocencia de mayu de l'ALLA

|
Academia de la Llingua Asturiana (ALLA)

La fecha llende pa matriculase pal segundu de los esámenes qu'entama la institución, programáu pal sábadu 26, ye'l día 24.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru–, que sirve pa que tolos ciudadanos interesaos puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

La prueba cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalgún miembru del tribunal que valorará’l so dominiu oral del idioma.

Güei abrióse la matrícula pa la convocatoria d'esti esame, que va celebrase'l día 26 a les 9.30 hores nel llar de l'Academia de la Llingua Asturiana (ALLA). Les persones interesaes en facer la prueba de conocencia tienen de plazu hasta'l día 24 pa formalizar la matrícula na sede de la institución (L’Águila 10, Uviéu) nel horariu siguiente: de 9 a 15 hores y de 16 a 19 hores, de llunes a xueves, y de 9 a 14 hores, los vienres.

 

 

Contador Estadistiques