Ábrese al tráficu la carretera a los Llagos

|
Ercina

Taba zarrada por xelu y nieve, lo qu'impidía dende'l sábadu activar el Plan Especial de Tresporte, que va tar vixente hasta'l 8 d'abril.

El Plan Especial de Tresporte a los Llagos de Cuadonga taba previsto qu'entrara en vigor per primer vegada esti añu'l día 24 cola mira de regular l'accesu a esti espaciu protexíu mientres la Selmana Santa, pero les condiciones meteorolóxiques impidieron l'accesu al llugar. El bon tiempu permitió que güei pudiera abrise la CO-4, polo que los autobuses de la empresa concesionaria y los taxis lanzadera yá tán emprestando'l serviciu.

L'accesu en vehículu priváu va tar prohibíu dende les 7.30 hasta les 21 hores estos díes y, amás, van caltenese les esixencies de calificación enerxética a los autocares que cubren el trayeutu, qu’han ser menos contaminantes, cola mira d'aumentar la proteición d'esti enclave del Parque Nacional de los Picos de Europa. D’alcuerdu col calendariu publicáu nel Boletín Oficial del Principáu d’Asturias (BOPA), que se pue consultar na web del Consorciu de Tresportes d'Asturies (CTA), el plan va funcionar de nuevo del 28 d'abril al 1 de mayu y tolos fines de selmana d'esti últimu mes.

Coincidiendo cola llegada del branu, los visitantes van tener de facer usu del tresporte especial coleutivu del 1 de xunu al 30 de setiembre, sacante’l 25 de xunetu y el 8 de setiembre, coincidiendo col Día del Pastor y el Día Nacional d'Asturies, de manera respeutiva. Na seronda, les restricciones van repitise los díes 6, 7, 12, 13, 14, 20, 21, 27 y 28 d'ochobre y del 6 al 9 d'avientu, ponte de la Constitución.

Contador Estadistiques