Abre al públicu la Quinta de los Selgas

Depués d'años trancáu nel mayor de los misterios, abre al públicu la residencia de la familia Selgas-Fagalde en Cuideiru. Construyía ente 1870 y 1896, la mansión d'El Pitu ye una de les pieces más importantes de l'arquitectura civil asturiana. Fechu según los proyectos de Fortunato, el más cultu de los hermanos Selgas, el palaciu, d'estilu neoclásicu con resabios afrancesaos, dexó de ser residencia de los Selgas Fagalde depués de que la segunda xeneración de la familia morriere ensin dexar descendencia, pasando'l palaciu a manes d'una fundación na que tan l'Arzobispáu, la Universidá, el Gobiernu asturianu y l'Ayuntamientu de Cuideiru.Amás del edificiu del Palaciu, la Quinta Selgas ye famosa poles sos más de nueve hectaries de xardinos, obra d'especialistes franceses que ficieron d'El Pitu el Versalles asturianu. Sequoyes, Cedros y los primeros ocalitos que llegaron a Asturies son les pieces más colosales d'unos xardinos estraos d'estanques de peces esóticos y invernaderos de fierro y cristal con calefacción onde se críen plantes tropicales. La Quinta Selgas atecha tamién una de les colecciones particulares d'arte más importantes d'Asturies. Bayura de cuadros (más de 200 óleos) d'autores como Goya, Tiziano, Rubens, Lucas Jordan, Carreño Miranda o Picasso, los techos pintaos por Casto Plasencia son la parte más impresionante d'un patrimoniu que tamién inclúi les ayalgues arqueolóxiques que Fortunato Selgas foi atropando nos sos viaxes. Les artes aplicaes tamién rescamplen nel Palaciu, con trabayos de carpintería y cristalería de los meyores profesionales d'Europa y pieces como'l sepulcru de piedra del neñu José Selgas, fechu por Mariano Benlliure.La casa de los Selgas tamién da llugar a l'anécdota y el misteriu. Ente les histories gracioses ta la que diz que Fortunato mercó'l altar de la Ilesia prerrománica de Santianes de Pravia (SVIII) por 25 pesetes nel chigre onde la teníen de mesa pa ponela na Ilesia de Jesús Nazareno. Otres histories son más revesoses, como la del cuadru de L'Asunción de la Virxe d'El Greco, que robaron del palaciu cuando la Guerra Civil y acabó en manes d'un coleccionista americanu, que lu devolvió en 1978. Sicasí, la historia más guapa ye la del cuadru de Goya d'Anibal pasando los Alpes, un cuadru que se tenía por destruyíu y qu'apaeció en 1993 cuando taben revisándose los fondos de la colección.Visitar la Quinta Selgas nun ye fácil. Namás se permiten 32 persones al día que paguen seyes euros d'entrada. El cupu de visites yá ta llenu hasta últimos d'añu. Una cosa curiosa ye qu'al entrar hai que calzar unos patucos pa nun rayar la madera del suelu. Polo menos, yá ye pública la entrada a una maravilla de la que dicen que dixo'l presidente gallegu Manuel Fraga cuando lu convidó Sergio Marqués a visitala va siete años, que taba bien pesllada porque nun se podía dexar entrar a cualquiera a ver aquello.