Abiertu'l plazu pa participar nel númberu 15 de 'Formientu'

Galán anuncia que va ser el númberu caberu que dirixa de la revista de lliteratura mozo.

Ta acabante abrise'l plazu pa presentar testos pal númberu 15 de 'Formientu', que saldrá enantes de que termine l'añu. Esti númberu de la revista na que s'asoleya la obra d'autores mozos va ser el caberu dirixíu por Inaciu Galán. "El futuru de la revista queda na voluntá del Conseyu de Redacción y de los autores que quieran implicase na so continuidá", esplica'l fundador de 'Formientu' nel 2006, hai agora diez años.

Por mor del calter xeneracional de 'Formientu', van poder presentar testos los autores ñacíos del añu 1980 n’adelantre. Los testos han unviase acompañaos de fecha y llugar de ñacimientu, teléfonu y pequeña biografía, hasta'l 30 de setiembre a la direición de corréu electrónicu revistaformientu@gmail.com

Pueden presentase obres de tolos xéneros, amás de tornes, teniendo preferencia les d’autores mozos d’otres lliteratures, asina como crítiques lliteraries de llibros n’asturianu o n’otres llingües.