Abiertu’l plazu pa participar nel IX Concursu de Microrrellatos Mineros Manuel Nevado Madrid

La Fundación Juan Muñiz Zapico, de CC OO, ta acabante de convocar el IX Concursu de Microrrellatos Mineros Manuel Nevado Madrid. El plazu pa presentar orixinales, tanto n’asturianu como en castellanu, fina’l 22 d’ochobre.

Esti concursu, que lleva’l nome del históricu llíder mineru antifranquista, ye un referente ente los eventos lliterarios venceyaos al mundu de la minería. Escritores de tol Estáu, Europa y Llationamérica manden los sos microrrellatos pa participar nél y optar al primer premiu, compuestu por 600 euros (300 en metálico, un llote de llibros y un grabáu de Manuel Calvo valoráu en 300 euros). Amás, la Fundación Juan Muñiz Zapico tamién premia al meyor escritu n’asturianu con 350 euros (200 euros en metálico y un llote de llibros valoráu en 150), dalgo que nun quita pa que tolos trabayos fechos en llingua asturiana pueda tamién optar al primer premiu. Otros dos accésit qu’entrega la Fundación son el de ‘Testimoniu históricu’, pa obres que falen de fechos reales siempre en rellación con conteníos históricos o acontecimientos socedíos nel entornu familiar o llaboral mineru; y el de ‘Mocedá’, pa menores de 26 años –los autores que tengan esa edá deben indicalo xunto al alcuñu del so trabayu, lo que nun quita pa que puedan aspirar al primer premiu–. Los ganadores d’estos dos accésit van llevase 100 euros en metálico más un llote de llibros con un valor de 150 euros.

Los trabayos presentaos han de ser orixinales, con un conteníu qu’ha de falar necesariamente de dalgún aspeutu –motivos temáticos, personaxes, argumentu o ambientación– venceyáu col mundu de la minería de cualquier país, siendo’l máximu de microrrellatos permitíos por autor de dos. La estensión nun va poder ser mayor de 40 llinies con cuerpu 12 d’una fonte asemeyada a ‘Times New Roman’, y el trabayu ha de dir dientro d’un sobre acompañáu d’una plica col alcuñu y los títulos de les obres na so portada, y colos datos del autor nel so interior. El plazu pa unviar los orixinales va allargase hasta’l 22 d’ochobre y el fallu del xuráu, presidíu pol caderalgu Benigno Delmiro Coto, va dase a conocer el 4 d’avientu coincidiendo cola fiesta minera de Santa Bárbola.

Na edición del añu pasáu, el ganador del accésit asturianu foi Gabino Busto Hevia, pol microrrellatu ‘Chamiceru’, mentes que’l premiu absolutu llevólu la castellonense Elia Dembilio Mezquita por ‘La luz de emergencia’. Ánxel Nava, pela so parte, llevóse dos menciones especiales del xuráu por ‘El castillete’, testu dedicáu a Nel Amaro, y ‘El penitente’. En total, participaron 161 microrrellatos procedentes de llugares tán llonxanos como México, Cuba, Honduras, Bolivia, Chile y Uruguái, y otros más cercanos como Países Baxos y Dinamarca.